Ministériu Saúde husu ba komunidade sira ne’ebé hakarak han na’an fahi, liuliu ida ne’ebé fa’an iha merkadu tenke ho kuidadu tanba balu moras ona maka oho hodi ba halo negósiu.

Vise-Ministru Saúde, Bonifácio Maukoli dos Reis hateten, Ministériu Saúde (MS) husu komunidade sira hotu nia konxiénsia labele konsumu naan fahi ne’ebé moras.

“Agora daudaun fahi moras no mate kona peste. Ne’e duni, oinsá ema hotu-hotu iha konxiénsia labele han naan fahi ne’ebé moras maka mate ne’e” dehan nia, Palásiu Sinzas, Kaikoli-Dili, horisehik.

-ona ba prevensaun, nia dehan, Ministériu Agrikultura bele halo intervensaun ba animál sira ne’ebé moras, nune’e komunidade sira bele konsumu na’an fahi ne’ebé di'ak labele moras hodi afeta ba sira-nia saúde.

Antes ne’e, iha Uma Fukun PN, deputadu sira fó sai hikas avizu ne’e atu kuidadu ho animál moras tanba ema bele hetan fali moras bainhira konsumu.

Deputadu Bankada Partidu Demokrátiku (PD), Mariano Assanami Sabino, ne’ebé mós nu’udar eis-Ministru Agrikultura hateten, kona-ba fahi ka animál ruma ne’ebé mate tanba moras, labele husik para ema han tanba seidauk hatene kauza husi animál nia-moras ne’e.

“Ita han moras ne’e da'et ba ita, kuandu da'et ona ema ida bele da'et ba sira seluk. Ohin loron ne’e ita nia ospitál emerjénsia de'it sei la deteta moras animál ninia kauza”, dehan nia, iha Uma Fukun, horisehik.

Nia dehan, bainhira la konsege deteta moras animál ne’e no sira la antesipa, tanba tan ne’e karantina importante tebes hodi haree husi sira-nia servisu hodi proteje moras ne’e.

“Ita tenke reforsa servisu karantina Timor-Leste tenke fasilita tau osan hodi bele funsiona nafatin”, dehan nia.

Husi servisu hirak ne’e maka bele deteta moras bele fó perigu ba ema ka lae, maibé kuandu animál ruma mate tanba moras proibidu atu labele han.