Tuir Ministru Obras Publika, Abel Pires hatete, lansamentu ne’e realiza tanba bazeia ba esperensia iha tinan 2020 too iha 2021, udan boot mosu mai estragus infraestrutura barak.

“Husi kalkulasaun ita halo gastus purvolta millaun $300, to'o agora mos reabilitasaun seidauk hotu entaun ita iha opsaun rua atu kontinua hanesan ne'e, depois tinan-tinan kuandu ita halo rehabilitasaun ou ita sa’e ba leten para halo prevensaun, implementasaun ne’e nia benefísiu barak,”dehan nia iha Suku Metiaut, sesta (07/10).

Tuir MOP, durante iha tempu udan, udan-been ba liu tasi, maibé kuandu halo intervensaun lalais, velosidade bee bele menus, entaun bee sei mout ba rai okos, tinan ida ou tinan rua ne’e bee-matan foun sei mosu.

“Iha tempu hanesan, sedimentasaun ne’ebé agora ita haree iha kraik ne’e kuandu estrutura prevensaun ne’e to’o ona iha leten, sei menus tebes, ho ida-ne’e rísku atu estraga infraestrutura sira hanesan estrada, ponte, moru ptotesaun ne’e, sei menus tebes, entaun ho ida-ne’e mak la’o ba tinan oin, rísku ne’e menus entaun ita-nia osan ne’e ita bele uza fali ba buat seluk,” nia dehan.

Implementasaun programa prezervasaun udan-been no rai ne’e hahú iha fulan Marsu tinan 2022, hetan apoiu husi Autoridade Nasionál Água no Saneamentu Institutu Públiku ho instituisaun relevante hodi halo survey iha Dili laran tomak hahú husi Akanunu, Hera nian to’o Manleuanna, no iha survey ne’e kada fatin tau kedas iha dezeñu.

Governante ne’e dehan, kona-ba kustu ba programa ne’e, ladun barak, daudauk ne’e invole estrutura mão de obra, tanba esforsu mão de obra involve populasaun barak, inklui joven no inan-aman sira, lorloron populasaun besik atus neen iha Dili laran tomak.

“Benefisiu ida tan ba ita nia populasaun sira hanesan joven sira atu prezerva bee, entaun redus risku ba insfraestratura iha nasaun ba ema hotu-hotu kontente. Maibé loos duni, ida ne'e intervesaun intermu hein tinan rua mak foin hetan ninia benefisiu loloos,”tenik nia.

“Kompara ho benefisiu ohin ha'u temi ona ne'e kiikoan tebes ho montante millaun $2.5 mill ne'e mos sei halo pagamentu ba faze daruak. Agora ita transfere uluk pursentu 40, husi 40% ne’e ita halo akompañamentu, depois kuandu implementa hotu ona ita transfere tan 60%,”dehan Ministru Abel.

Iha fatin hanesan, Prezidente ANAS, Domingos Pinto, hatete, atividade ida ne’e hahú implementa ona iha fulan maio ho halo survey durante fulan rua, hahú husi Akanunu, Bekora, Lahane, Bekusi, Maloa, Manleuana, Metiaut no mós fatin sira seluk.

Nia dehan, atividade ne’e ho objetivu atu konserva bee no rai ho metode implementasaun sira ne’ebé uza metodu refletasaun, hafoin halo travasaun.

“Travasaun iha tipu rua hanesan travasaun bee no sedementasaun rai husi foho mai, enkuantu iha metodu rua ida, uza estrutura ne'ebe ita seidauk hahú, agora dadaun ita hahú tipu travasaun ne'ebé uza material lokal ninia hodi bele uza fatuk no au sira ne'e hodi trava movimentu bee nia no sedementasaun ninia,”.

Entretantu, nia dehan, presiza orsamentu ho montante tokon $18 hodi bele resolve problema erosaun no konservasaun bee ninia.