Tuir Ministru Koordenadór Asuntu Ekonomiku, Joaquim Amaral, to’o ohin loron governu seidauk halo diskusaun ba montante salariu minimu ba Timor-Leste.
"Ne'e opsaun, kerdizer iha indikativu ida katak governu iha vontade hasa'e, agora seidauk iha desizaun, númeru ne'ebé tau ona ne'e to'o tempu iha diskusaun ita sei foti desizaun tanba ne'e keta halo lai espekulasaun númeru," dehan Ministru Joaquim ba jornalista jornal INDEPENDENTE iha palasiu Governu, Kuarta (13/07).
Nia hatete, desizaun ba montante salariu minimu ne’e desizaun Konsellu Ministru nian la’os desizaun Ministru Finansas.
"Ne'e desizaun Konsellu Ministru, hotu-hotu nia desizaun laos Ministru Finansas nian mesak, purke proposta ne'e aprova husi Konsellu Ministru mak lori ba Parlamentu aprova mais ne'e responsabilidade governu nian," dehan nia .
Kona-ba montante ne’ebé governu prefere, nia dehan, sei iha faze diskusaun no nia parte seidauk bele specula montante salariu minimu.
"Agora ha'u lakoi spekula uluk orsida imi (jornalista) dehan ha'u nian boot liu, balun kiik liu, tanba grupu sira mós iha razaun atu aprezenta, ne'ebé ita mós hein tempu par atu diskute par sira mós rona," nia hatete.
Iha fatin ketak, Prezidente Komisaun C, Maria Angelica Rangel hatete, atu hasa'e saláriu bázika governu presiza halo estudus klean ba ekonómia rai laran.
"Estudus la'ós dehan ohin tenke hasa'e kedas maibé tenke estudu hodi haree sasán folin, halo estudu ida makro liu atu nune'e ita foin deside atu hasa'e," dehan nia, iha Parlamentu Nasionál, Kuarta (13/07).
Haree ba situasaun ekonomia agora, iha nesesidade atu governu hasa’e saláriu minimu maibé tenke halo estudu tanba atu hasai osan husi Fundu Petrolíferu labele hasai osan narnaran maibé tenke bazeia ba estudus no tenke iha lei mak foin hasai.
Iha fatin hanesan, Deputadu Bankada Partidu Demokratiku, Mariano Assanami Sabino konsidera hasa’e saláriu minimu husi $115 ba $135 seidauk sufisiente.
"Prontu, ekonomista tenke estuda buat hotu-hotu, maibé ne'e rai kiik ida, ita presiza dignifika ema hotu ne'ebé ké halo servisu. Tanba sira mak na’in ba minarai, entaun hanusa mak sira kuandu sai ona traballadór bele moris ona," nia hatete.
Tuir nia, durante ne'e saláriu minimu ne'e susar ba trabaladór sira atu moris hanesan ema. Entaun governu tenke haree atu hasa'e maibé tenke bazeia ba situasaun real ne'ebé iha nune'e bele sustenta sira nia moris lorloron nian.
"PD apresia governu se karik sira iha ona insisiativa atu hamosu proposta, maibé hasa'e de'it ba $135 ne'e seidauk to'o traballadór sira-nia nesesidade, Ita presiza hasa'e ba $200 ba leten, ha’u hanoin ne'e bele ona, prinsípiu mak ne'e mina povu nian no povu ida ne'e presiza moris ho dignu, see mak funsionáriu no traballadór tenke moris di'ak."
Prezidente Bankada CNRT, Duarte Nunes hatete, bainhira hasa'e saláriu minimu Ministériu Finansas tenke halo aprezentasaun ida atu ema hotu bele hatene.
"Ita labele dehan mai tuur-tuur mehi, aban halo desizaun mais depois nia impaktu ba tempu ikus," nia hateten.
Nia dehan, governu planu ona atu tinan oin hasa’e saláriu minimu ba $135, maibé Bankada seidauk hetan esplikasaun ruma husi governu.
Molok ne’e, Ministru Finansas, Rui Augusto Gomes informa, governu ne’ebé lidera husi Primeiru Ministru Taur Matan Ruak hanoin ona atu hasa’e salariu minimu iha tinan 2023.
"Foin lalais ita-boot sira asiste katak iha Parlamentu Nasionál rasik aprova ona Lei Grande Opsaun Planu iha ne'ebá estipula saláriu minimu sa'e ba $135, mais ne'e hahú iha 2023," dehan Rui iha Parlamentu Nasionál, Segunda (11/07).
Bainhira aumenta salariu minimu, nia hatete, subsidiu ba veteranu sira mós sei aumenta.
“Maibé keta haluha katak ida ne'e sei iha impaktu boot tebes, tanba kuandu saláriu minimu sa'e signifika (subsidiu) veteranus sira mós aumenta. Entaun saláriu minimu $135, veteranu sira-nia subvensaun, purtantu ne'e signifika katak, tuir ami-nia kalkulu millaun $20 sobre ba veteranu sira, tanba iha aumentu saláriu minimu," dehan.
