Ministru Interiór, Francisco da Costa Guterres hatete, hahú iha Janeiru ne'e sei halo diskusaun ho Komandu PNTL hodi fihir figura ne'ebé mak atu ba troka Komandante Jerál PNTL no Komandante Jerál daruak.
"Hein de'it, ami hein hela prosesu. Ami prosesa hela, pois mak ita haree tok. Ha'u seidauk iha lista. Maibé komesa agora, fulan ne'e ba oin to'o iha Marsu ami komesa diskute asuntu ne'e," dehan Ministru Francisco, iha Palásiu Governu, Kuarta (07/01).
Ministru ne’e hatutan, nia parte sei prepara baze legál balun, molok halo diskusaun klean ba asuntu ne'e ho Komandu Jerál PNTL.
Tuir dekretu-lei númeru 35/2024, 18 Outubru, kona-ba estatutu Polísia Nasionál Timor-Leste iha artigu Artigu 47.º, kona-ba Komandante Jerál, hatete;
- Komandante Jerál ne'e nomea no ezonera bazea ba rezolusaun husi Governu sub- proposta husi membru Governu ne'ebé responvél ba área seguransa interna ho mandatu tinan tolu bele renova dala ida de'it ba periodu ida tán.
- Nomeasaun ba Komandante Jerál tenke ho deviza Komisáriu Jerál Polísia ou Komisáriu.
- Se mak atu nomea ba kargu Komisáriu tenke nia deviza ka postu Komisáriu no Komisáriu Asisténte.
Ba Kargu Komandante Jeral daruak, tuir artigu 48 husi dekretu lei ne’e hatete:
- Segundu Komandante Jerál ne'e nomea no ezonera bazea ba rezolusaun husi Governu sub- proposta husi membru Governu ne'ebé responvél ba área seguransa interna ho mandatu tinan tolu bele renova la ida tan ba periodu ida tán.
- Nomeasaun ba Segundu Komandante Jerál tenke promove postu ba Komisáriu.
- Nomeasaun ba Segundu Komandante Jerál PNTL bele mai husi polísia ne'ebé ho postu Superintendente Xefe Polísia.
Entretantu, Komandante Jerál PNTL atual, Komisáriu Jerál Polísia Henrique da Costa no Komandante Jerál daruak, Komisáriu Pedro Belo, hetan nomeiasaun no posse iha 27 Marsu 2023, ba mandatu tinan tolu. Ho nune’e, iha 27 Marsu 2026, Komandante na’in rua ne’e sei termina sira-nia mandatu.
