Deputada Bankada KHUNTO, Irene Gonzaga Sarmento, kestiona postu saúde iha Postu Administrativu Barike, Munisípiu Manatuto, falta ai-moruk.

"Ha'u hetan informasaun husi komunidade sira-ne'ebá, sira hateten daudauk iha postu saúde agora stock ai-moruk laiha ona," dehan nia, iha Parlamentu Nasionál, horisehik.

Tuir nia, ai-moruk hanesan paracetamol ne'ebé sira baibain konsulta hanesan kabun moras, isin manas, maibé ai-moruk sira laiha hotu ona.

"Sira so ba konsulta klínika privadu sira mak foin hetan ai-moruk sira ne'e. Ida ne'e mak komunidade hato'o mai ha'u atu hato'o  ba Ministériu Saúde atu haree took asuntu ne'e ho sériu," nia relata.

Nia hateten, tanba agora komesa udan entaun ema sira komesa moras barak hanesan isin manas, kabun moras no muta.

"Tanba ne'e husu ministériu relevante atu haree ida ne'e, see bele haruka ai-moruk ba iha fatin ospitál sira-ne'ebé presiza, agora sira presiza tebes ai-moruk," nia informa.

Aliende husu mós ba Ministériu Saúde kona mákina ultrasonografi (USG) ne'ebé iha Orsamentu Jerál Estadu (OJE) 2020 Ministériu Saúde preve atu sosa.

"Ita tau ona osan atu hola mákina USG hitu (7), maibé la hatene mákina ne'e munisípiu ne'ebé mak hetan ona karik," Nia relata.

Nia hatutan, iha munisípiu Manatuto rasik to'o agora ba moras ne'ebé presiza USG atu leno tenke mai to'o iha Ospitál Nasionál Guido Valadares (HNGV), tanba mákina USG seidauk iha.

Iha faitin hanesan, Deputada Bankada Fretilin, Helena Martins Belo hateten, falta ai-moruk iha ospitál ne'e loos.

"Tanba semana kotuk prezensa Ministra Saúde ne'ebé mai Komisaun F, ami fó hatene ona no ministra rekoñese Servisu Autónomu Medikamentus no Ekipamentus Saúde (SAMES) mak haluha tiha sosá ai-moruk orsamentu 2021 nian," nia informa.

Nia informa,tanba ne'e komisaun bele konvida Diretór SAMES mai halo jusitifikasaun, tanba sá mak iha orsamentu, maibé nia haluha sosá ai-moruk.

"Maibé ida kona-ba ai-moruk paracetamol Ministra dehan sufisiente, maibé dala ruma pedidu mak atraza karik," nia relata.

Prezidente Bankada UDT, Francisco David Xavier Carlos hateten, Ministra Saúde labele fó sala ba SAMES kuandu falta ai-moruk iha ospitál sira.

"Tanba nia mak lidera no nia mak tenke halo jestaun di'ak, halo monitorizasaun ba fatin sira ne'ebé ké difisil tebes atu aranja ai-moruk,"dehan nia.

Nia hateten, maibé di'ak liu Parlamentu Nasionál fó xamada ba  Ministra Saúde no Diretór SAMES hodi mai halo esplikasaun ba preokupasaun sira ne'ebé Deputadu sira levanta kona-ba falta ai-moruk iha Sentru saúde, Postu Saúde no HNGV.