Tuir Ministru Edukasaun Juventude no Desportu, Armindo Maia, hateten, akordu ne’ebé parte rua asina la’ós foin ba dahuluk maibé akordu ne’e nuudar pasu kontinuasaun de’it husi akordu ne’ebé halo ona.

“Universidade Nasionál Timor-Lorosa’e nuudar parseiru estratéjiku iha area edukasaun no formasaun, tanba ne’e ministériu hakarak mellora kooperasaun hodi bele responde ba nesesidade formasaun rekursu umanu kualifikadu ba profesór sira. Ita presiza profesór kualifikadu atu nune’e bainhira ko’alia kona-ba edukasaun ho kualidade maka ita bele aposta iha área formasaun profesór,” dehan nia iha salaun VIP edifísiu MEJD, Vila Verde.

Nia dehan, Aleinde ne’e, iha mós área peskiza sientífika atividade akadémika, semináriu interkámbiu no atividade kulturál sira.

Iha fatin hanesan Reitór UNTL, João Soares Martins, hatutan, akordu ne’e importante ba instituisaun rua, atu nune’e bele haree modalidade di’ak hodi bele ezekuta prosesu kooperasaun ne’e.

“Akordu ne’e la haree de’it ba formasaun iha nível baxarelatu maibé sei haree mós ba nível lisensiatura no pos-graduasaun inklui servisu peskiza no estensaun komunitária nian," nia dehan,

Enkuantu, nia hateten, iha UNTL tau interese boot ba akordu ne’e, tanba UNTL iha fakuldade edukasaun arte umanidade (FEAH), ne’ebé halo mós formasaun ba profesór sira.

Ho nune’e, estudante sira iha fakuldade ne’e, sempre utiliza eskola sira hodi hala’o estájiu, tan ne’e atu iha legalidade no lejitimidade presiza iha duni kooperasaun hanesan ne’e.

Entretantu, UNTL mós iha fakuldade siénsia ezata ne’ebé mak halo formasaun ba área matemátika, fízika no kímika, ne’ebé área hirak ne’e importante iha nasaun Timor-Leste no fó vantajen ba UNTL no MEJD atu bele reforsa kooperasaun.