Tuir Diretor Jeral MEJD Luis Manuel da Costa Fernandes hatete, iha tinan fiskal 2022, iha orsamentu ratifikativu ne'ebé preparadu atu implementa programa eskola ba uma.

"Programa ida ita foin realiza ba dahuluk iha tinan ida ne'e, ho ida ne'e ita hahú pilotajen husi munisipiu Dili, tanba hola parte iha orsamentu jeral estadu nian ba tinan 2022, entaun programa ida ne'e ita sei implementa to'o iha fulan dezembru, hodi finaliza nia implementasaun,"dehan nia iha ESTV Bekora, Kinta (30/06).

Nia hatutan, objetivu husi programa ida ne'e determinadu to'o fulan 7, maibé presiza halo preparasaun ho ida ne'ebe mak di'ak, entaun tenke identifika se mak bele ba eskola no labele ba eskola, fasilidade no oinsa halo monitorizasaun ba programa refere.

Relasiona ho ida ne'e, sira sei haree hela ba preparasaun, atu nune'e bainhira preparadu ona to'o  final, mak programa ne'e sei realiza iha fulan Jullu no sei remata iha fulan dezembru tinan ne'e.

"Programa ida ne'e ho naran nova inisiativa husi governu ba tinan 2022 nian, no programa ida ne'e ho nia objetivu atu fasilita labarik sira hodi assesu ba iha edukasaun, tanba realidade sira hare'e katak, labarik sira ne'ebé mak ho tinan 3 to'o 5, tuir lolos asesu ona ba iha edukasaun pre-eskolar, maibé distansiamentu husi uma ba eskola do'ok, tanba labarik sira ho idade kiik deit, entaun governu ho inisiativa loke eskola ba uma atu nune'e fasilita sira," katak nia.

Nia informa, agora sei iha faze identifikasaun ba estudante sira hahu husi aldeia, atu nune'e bele identifika estudante hira mak sei eskola iha uma, labarik  hahú husi tinan 3 to'o tinan 7 mai kraik.

Nia esplika, servisu ida ne'e la'os MEJD mesak maibé servisu hamutuk ho MAE, hodi bele haree no hadi'a nia prossesu tomak.

"Pilotu iha Dili laran, entaun ami sei rezolve uluk Professor kontratadu sira, iha edukasaun pre-eskolar no ensinu báziku sira, tanba agora dadaun professor voluntariu sira iha eskola no MEJD mós halo ona verifikasaun ba dadus sira ne'e,”hakotu nia.