Ministru Asuntu Kombatente no Libertasaun Nasionál (MAKLN), Gil da Costa Monteiro ‘Oan Soru’ hatete, prosesu rejistu ba reklamasaun no kontestasaun remata ona iha 17 Abril ne’e.

Daudauk ne’e, nia dehan, MAKLN foin simu ona lista reklamasaun no kontestasaun husi Munisipiu Vikeke no Lautem.

“Kontestasaun no reklamasaun sira ne'ebé naton ami halo estensaun hahú iha fulan Abríl to'o 17 Abríl ne'e hotu tiha ona, maibé hotu iha loron Paskua entaun sira seidauk lori dokumentus ne'e mai. Foin mak lista husi Munisípiu rua mak mai, Vikeke ho Lospalos, restante ne'e seidauk mosu mai," dehan Oan Soru, iha Palásiu Governu, Kuarta (23/04).

Hafoin lista husi munisipiu tama hotu, nia hatutan, MAKLN foin bele anunsia total reklamasaun no kontestasaun.

"Lista sira husi munisípiu tama hotu mai mak ita foin anunsia, lae ha'u promete tiha data dokumentus sei iha munisípiu, ne'e orsida ita sala tan ona,” dehan nia.

Hafoin anunsia tiha, iha faze tuir mai sei haree ida ne'ebé mak tuir kritériu ne'e pagamentu la'o.

“Pagamentu la'ós la'o iha fulan hirak ne'e nia laran maibé nia sei bele to'o iha terseiro trimester. Orsamentu prevé iha tinan ida ne'e nia laran hotu, agora kestaun mak dokumentus sira ne'e mai hotu par ita haree ka lae, tanba reklamasaun ne'e belum tentu hotu-hotu mai ne'e loos hotu," nia afirma.

Iha 17 Marsu 2025, Ministru Oan Soru fó sai kona-ba totál dadus reklamasaun no kontestasaun ne’ebé sira simu ona iha faze dahuluk hamutuk 35,617. Dadus hirak ne’e mai husi munisipiu 13 no RAEOA ne’ebé rejistu husi 15 Janeiru to’o 14 Marsu 2025.