Tuir Vise Ministru MAE, Lino de Jesus Torrezão hatete, kareta 16 ne’ebé intrega ba Diretór Delegasaun PNDS ne’e,  kada munisipíu ida sei hetan kareta ida no viatura 3 seluk ba operasional téknika iha teritóriu  nasiónal.

“Governu intrega veiukulu ba Diretór Delegasaun Programa Nasiónal Dezenvolvimentu Suku (PNDS), atu fasilita atividade sira nia iha suku, hodi atinji planu servisu iha baze,”dehan nia bainhira iha serimonia intrega viatura, iha Edifísiu MAE, (10/05).

Nia apela ba Diretór Delegasaun sira ne’e atu uza kareta ne’e ho di'ak atu bele fasilita sira nia servisu iha munisipiu sira.

“Ohin simbolikamente intrega Viatura sira ne’e ba Diretór Delegasaun Munisipiu 4 hanesan Aileu, Dili, Ermera no Likisa,”tenik nia.

Iha fatin hanesan, Diretóra Sekretariadu Tekniku PNDS, Claudina Soares Pinto hatete, kada kareta ida sosa ho osan  montante $37.290.

Alende ida ne’e Direktor Direção Geral  Dezenvolvimentu  Rural Rosito Guterres hateten ba Diretor Distrital  PNDS katak,  viatura ne’ebè simu estadu nian uza ho responsavel labele uza ba halo servisu privadu maibe tenke servisu nesesida ne’ebè mak iha no nia mos hateten katak,  kaereta ne’e operasionál tamba sasan ne’ebè todan tula kareta labele tula ho motor.

Entretantu, Diretor Delegasaun PNDS  Dili Tadeo Fransisco de Araujo Soares ne’ebè simu viatura hatete, kareta ne’ebè sira simu atu fasilita halo servisu PNDS nian ho di'ak liu tan.

Jornalista: Novencio do Carmo

Asistente Editor: Saturnina da Costa