Ekipamentu nee, atu fasilita diak liu tan Xefe Suku sira atu hala’o servisu iha suku ho diak.
"Ohin ha'u mai iha autoridade munisipiu Dili, ba dahuluk atu intrega simbolikamente, komputador ida, printer 1 no mos UPS ba suku hotu-hotu iha munisipiu Dili,” dehan Ministru Administrasaun Estatal (MAE) Miguel Pereira Carvalho, hafoin intrega material hirak ne'e ba Xefe Suku sira, iha PAM, Dili, kuarta horseik (30/03).
Nia hateten, material hirak ne'ebé distribui ba suku sira hanesan, parte ida husi programa VIII governu nian liu husi MAE hodi implementa iha tinan ne'e.
Ho nunee, material hirak nee sei intrega hotu ba iha suku 452 iha TL.
"Governu promete antes mandatu ne'e remata sede suku hotu-hotu sira iha territoriu nasional ne'e, tenke reabilita hotu ona ate agora sede suku 400 ita reabilita ona," katak nia.
Nia dehan, sentidu governu apoiu materia hirak ne'e oinsa mak parte auoridade lokal atu bele hala'o servisu ho diak liu tan no bele halo atendimentu ba komunidade ho di'ak.
"Ita apoiu ekipamentu eletroniku sira, importante tebes ba xefe suku sira atu bele ajuda sira hala'o atribuisaun ne'ebé hatuur iha lei nu.9/2016 ne'ebe aprova ba suku sira," tenik nia.
Tuir nia, xefe suku sira sai hanesan ponte ligasaun ho komunidade sira no administrasaun estadu no postu adminitrativu sira, atu bele halo prestasaun servisu hodi servi interese públiku no komum.
Enkuantu, tuir planu programa atribui ekipamentu ba suku sira iha teritoriu laran tomak, sei konklui iha fulan abril ou maiu tinan nee.
Iha Fatin hanesan Prezidente Autoridade Munisipiu Dili, Guilhermina Filomena Saldanha hateten, ho komitmentu husi MAE buka atu hatene preokupasaun xefe suku sira nian ba fasilidade iha suku 31 iha Dili.
"Ha'u nia rekomenda ba xefe suku sira atu uza fasilidade sira ne'e ho di'ak no atendimentu publiku ho diak no buka oinsa atu bele apoiu servisu sira seluk mak iha suku nia laran ho ekipamentus ne'ebe foin simu", nia Informa.
Entretantu, MAE apoiu materia ekipamentu elektroniku hirak ne'e Komputador 452, Printer 452 no UPS 452 ba suku hotu-hotu iha Timor-Leste tomak
Iha Sorin seluk, Xefe Suku, Hera, Gil de Araujo, senti orgullu no agradese ba MAE ne’ebé servisu hamutuk ho autoridade munisipiu Dili, sira bele hetan duni apoiu sira nee.
