Diretór Ezekutivu Luta Hamutuk, José Alves da Costa hatete, komitmentu ida ne'e desde mai iha tinan 2018-2020 ne'ebé iha pakote ida, tanba estrada nasionál ligasaun husi Dili entre munisípiu, no munisípiu ba munisípiu seluk ne'e kategória estrada nasionál.
Nia dehan, estrada nasionál kuaze hotu-hotu uza orsamentu empréstimu, ne'ebé jata ba Ermera ne'e 2019 ka 2020 liu-ba, maibé tanba politikamente ukun na'in sira ladauk sensivel ho buat ne'e ladauk aselera ninia prosesu sira, entaun ne'e mak pendente to'o agora.
Maibé, loloos iha planu ne'e antes 2030 estrada ligasaun nasionál ne'e di'ak ona 100%, maibé ida ne'e foin atu hahú.
Nia esplika, maske Luta Hamutuk durante ne'e kumpri emprestimu, maibé tanba sira seluk halo ona emprestimu hodi konstrui estrada sira ne'ebé iha, entaun Ermera mós iha direitu atu hetan estrada di'ak.
Nia argumenta, sekarik governante sira ne'e uza osan estadu, uza osan fundu minarai ne'e efetivu, efikas la presiza emprestimu, ida de'it osan, duké sosa prado, duké halo luan estrada ka hadia estrada ne'e sobu, taka, nusa mak osan ne'e la tau hamutuk nune'e halo fali konstrui fali estrada iha fatin seluk.
"Mais tanba ita nia inkapasidade jestaun iha governante sira, entaun hakarak ka lakohi ita tenke deve, ne'ebé agora ha'u hanoin ne'e Ermera ne'e presiza duni estrada di'ak, ne'ebé di'ak liu aselera, nune'e Ermera mós goza uitoan sira nia moris ho estrada ne'ebé di'ak, importante mak halo jestaun di'ak," dehan José Alves, ba jornalista Jornál INDEPEDENTE iha nia kna'ar fatin Faról, Sesta (09/01).
Antes ne'e, Banku Mundiál aseita orsamentu empréstimu tokon $38 ne’ebé governu liu husi Ministériu Obras Publikas planu hodi halo ba projetu reabilitasaun estrada munisípiu Ermera, husi Gleno liga ba Letefoho.
Project Maneger Unit Obras Publikas, Amilcar da Costa Vitor hatete, Banku Mundiál ofisiálmente aprova ona orsamentu impréstimu bá projetu reabilitasaun estrada Gleno liga ba Letefoho ho montante miliaun $38.
“Projetu imprestimu ne'ebé liga ho estrada Ermera, Gleno bá Letefo ni’an, ita hetan ona naun objeksaun husi Banku Mundiál. Mesmu nia prosesu naruk tebes, maibé to'o fim nia kualidade dokumemtus ne'ebé oferese ba Banku ne'e satisfas ho rekerimentus ne'ebé nesesidade bá prosesu procuramention ne'e rasik,” Dehan Amilcar ba Média INDEPENDENTE, iha nia knar fatin Kaikoli, Kinta (08/01).
Nia afirma, ohin ofisial asina ona ho Banku Mundiál liu husi sistema step ne'ebé instala husi Banku Mundiál ne'ebé dirije direta ba nasionál procurament comention, tanbá ne'e mak hetan informasaun kona-ba prosesu projetu ne’e, iha pozitivu finansamentu husi banku mundiál.
