Diretór Konsorsium Aviaun Malindo Airlines Malazia, Pedro Carasacalão hatete, pasazeiru hamutuk na’in 53 ba ho aviaun Malindo iha loron 19 fulan-abril, ba Malaizia no tranzita fali ba Englatera maibé imigrasaun husi Malazia, Kuala Lumpur la fó sira atu ba Englatera tanba sira nia viza no tikete ne’e to’o deit iha Malazia.
“Pasazeiru sira ne’e to’o iha Malazia, balun telefone ha’u hodi husu ajuda ba problema ne’ebé sira infrenta, nune’e ha’u tenta telefone fali ajensia NARPOV ne’ebé fa’an tiket ne’e maibé telefone taka, ha’u dehan ba sira problema tiket ne’e laos ha’u nia responsavel no ajensia sira tenke responsavel," dehan Pedro iha Aeroportu Internasional Nikolau Lobato Dili, ba jornalista Online Independente, Sabádu ohin (24/04).
Pasazeiru sira labele kontinua halo viajen tanba ho razaun tiket ho viza to’o deit iha Malazia no parte imigrasaun tahan hodi fó ameasa ba sira atu lori sira ba iha parte polisia Malazia.
Tanba tuir regras imigrasaun Malazia katak halo tranzitu tenke iha oras 24 de’it se liu ida ne’e, parte kompetente tenke fó informasaun antes atu rezolve.
Pedro hatuta, laiha dalan seluk no nia foti responsabilidade ida ne’e atu telefone ba aviaun Malindo iha Kuala Lumpur atu tula fali sira mai Dili.
Tanba nia lakohi Timor-oan sai vitima iha sela Malazia, nia ho ajensia Malindo tau osan hamutuk hodi selu ótel ba loron 5 nian hamutuk dolar amerika rihun $20 ($20,000) no aluga fali aviaun Malindo hodi tula fali mai Dili.
Nia akresenta, durante Timor-oan iha ótel, British High Comission investiga sira ida-idak no halo teste PCR hodi deteta Timor-oan na’in 1 positivu Covid-19, agora dadauk hala’o kuarentena Malazia.
Entre pasazeirus na’in 53 ne’e iha na’in 18 mak iha pasaporte Portugal no na’in 35 ho deit pasaporte Timor-Leste.
Nune’e pasazeirus na’in 18 kontinua hala’o sira nia viajen ho aviaun Europa nian ba Lisboa Portugal.
Pedro mós lamenta ho Ajensia balun iha Dili ne’ebé fa’an tiket ba pasazeiru sira laiha responsabilidade no kada ema na’in ida hatama osan dolar amerika rihun $3 ($3,000) balun liu ida ne’e. Pasazeiru sira labele foti fali osan sira ne’e tanba konsidera lakon ona.
Nune’e Pasazeirus na’in 16 ne’ebé antes kansela sira nia viajen ba Malazia sei iha direitu atu husu fali sira nia osan ba ajensia ne’e.

Jornalista:Camilio de Sousa

Editor:jose Sarito Amaral