Tuir informasaun ne'ebé nia simu, Antonio dehan, parte saúde Kovalima kontinua fó tramentu ba labarik sira iha ospital hodi bele rekopera.

Molok ne'e, tuir dadus husi Hospital Nasionál Guido Valadares (HNGV), númeru kazu dengue hahú rejistu iha fulan Janeiru ho kazu 16.

Númeru ne'e sa'e iha fulan Fevereiru ba 45 kazu no sa'e maka'as liu tan ba 92 kazu iha fulan Marsu no rezulta labarik na'in ida (1) mate.

Iha fulan Abril kazu dengue tuun ba 24, maibé husi númeru ne'e kazu mate sa'e ba kazu 3.

“Iha fulan Abril ne’e kazu dengue hamutuk 24 rezulta ona labarik na’in 3 mak mate,” dehan Xefe Unidade Pediatria HNGV Breviado dos Santos nia iha nia knar fatin, Tersa (07/04).

Breavido dehan, labarik sira ne'ebé kona dengue maioria ho idade tinan 5 to'o tinan 14, no mate tanba sofre Dengue Shock Syndrome (DSS).

"Sira mai komplikadu tiha ona entaun labele salva," dehan nia.

Moras dengue, nia dehan, mai husi susuk aedes aegepty, ho sintomas isin-manas maka’as no ulun moras.

"Impaktu husi moras dengue ne’e bazeia ba sanitasaun no ijiene pessoal tanba ne’e atu hadook an husi dengue ne’e presiza kuidadu ijiene pessoal, hamoos nafatin ambiente, bee labele nalihun atu susuk moris iha laran," dehan nia.

Entretantu, tuir dadus husi Ministériu Saúde (MS) iha fulan Janeiru to'o Abril 2020, iha Timor laran tomak iha kazu dengue 703, kompostu husi Dengue Fever (DF) 622 kazu, Dengue Hemorrhagic Fever (DHF) 78 kazu, no Dengue Shock Syndrome (DSS) kazu 3.

Husi dadus ne'e, kazu dengue aas iha Munisípiu Dili hamutuk kazu 310, munisípiu Ermera hamutuk 293 kazu, Aileu kazu 1, Ainaro kazu 3, Baukau kazu 4, Bobonaro kazu 10, Kovalima kazu 27, Lautem kazu 10, Likisa kazu 36, Manatuto kazu 7, no Manufahi kazu 2. Enkuantu Vikeke no RAEOA la rejista kazu dengue.