Koronél Coliati Konsidera Kargu XEM Todan Featured

By Cristina Ximenes Outubru 30, 2018 2217
Prezidente Repúblika, Francisco Guterres Lú Olo, fó pose ba Koronél Calisto Santos Coli “Coliati” nu’udar Xefe Estadu Maiór FALINTIL- Forsa Defeza Timor-Leste (F-FDTL) iha Palasiu Prezidente Dili. FOTO: PR Prezidente Repúblika, Francisco Guterres Lú Olo, fó pose ba Koronél Calisto Santos Coli “Coliati” nu’udar Xefe Estadu Maiór FALINTIL- Forsa Defeza Timor-Leste (F-FDTL) iha Palasiu Prezidente Dili. FOTO: PR

DILI: Xefe Estadu Maiór Forsa Armada (XEMFA), Koronél Calisto dos Santos ‘Coliati’ orgullu hetan kargu foun, maibé konsidera knaar ne’e nu’udar naha todan.

“Nu’udar militár primeiru lugar sente haksolok, espesiál liu sentimentu ida ne’ebé todan hanesan ohin ha’u nia Xefe Estadu Maiór Jenerál rasik pronunsia katak hahú ohin iha momentu istóriku ida ne’ebé jerasaun tuan fó fiar ka tatoli hela instituisaun militár ida ne’e ba jerasaun foin-sa’e,” dehan nia, iha Palasiu Prezidensiál Bairru-Pité, horisehik.

Maski nune’e, Coliati sente nu’udar tuan ne’ebé hahú prosesu funu iha banku universitáriu (Universitas Timor-Timur-UNITIM), maski nune’e, la kompleta funu gerrilla hanesan veteranu sira seluk to’o tinan 24.

“Ha’u iha baze-de-apoiu bainhira baze-de-apoiu rahun ha’u tun mai sidade, iha sidade ha’u hala’o fila-fali ha’u-nia misaun iha frente klandestina”, tenik nia.

Tanba nesesidade funu ninia, Coliati hetan fiar husi Komandu-da-luta fila-fali sa’e ba ai-laran asume postu hanesan Vise-Sekretáriu ba Rejiaun IV ho responsabilidade ba asuntu polítiku no militár iha fronteira, liu-liu iha Unidade Fronteira Súl.

Nia dehan, vizaun hanesan XEMFA iha ona planu estratéjiku 2020 ne’ebé hahú husi 2011-2017 no agora 2018 ba 2023, ne’ebé sei hala’o tuir.

Ne’e duni, sei kontinua servisu XEMFA, Brigadeiru Falur Rate Laek hodi kompleta karik presiza sei halo di’ak liután.

Tanba ne’e, kna’ar espesífiku Xefe Estadu Maiór hanesan kolaboradór prinsipál ba Xefe Estadu Maiór Jenerál iha área administrativa no lojístika.

PR Lú Olo Felisita XEMFA

Prezidente Repúblika (PR), Francisco Guterres ‘Lú Olo’ felisita no enkoraja XEMFA, Calisto Coliati, hanesan kompatriota ne’ebé iha períodu susar luta libertasaun nasionál nian fó-aan tomak hala’o kna’ar oioin militár no klandestina.

Koronél Coliati simu pose atu kaer kna’ar importante tebes iha diresaun Estadu Maiór Koordenadór Konjuntu no hamutuk ho Vise-Xefe Estadu Maiór Jenerál Forsa Armada, sei fó akonsellamentu ba Xefe Estadu Maiór Jenerál Forsa Armada.

“Ha’u enkoraja Koronél Coliati atu kontribui ba ita nia Forsa Armada dezenvolve no moderniza, nu’udar instituisaun ne’ebé tane aas nafatin espíritu, valór no determinasaun asuwa'in FALINTIL sira nian no atu la’o ba oin, ho laran hakmatek no determinadu, tuir interese nasaun nian”, tenik Lú Olo.

Estadu Maiór Koordenadór Konjuntu maka órgaun planeamentu, koordenasaun no kontrolu ba atividade Estadu Maiór no Komponente sira nian.

Órgaun ne’e maka kontribui ba tulun XEMJFA foti desizaun ne’ebé de’it, ne’ebé relasiona ho prosesu re-organizasaun ba estrutura superiór Forsa Defeza nian, jestaun rekursu no infraestrutura, instrusaun no doutrina, planeamentu no treinamentu ba Komponente Operasionál sira.

Knaar sira ne'e ezijente no kompleksu tebes. Kna’ar sira ne'e ezije kapasidade servisu no organizasaun aas tebes, tenke hatene oinsá motiva ema no koordena, tenke iha koñesimentu tékniku profisionál aas kona-ba asuntu oioin relasiona ho Estadu Maiór, hodi bele tulun Komandu foti desizaun ho di‘ak.

Koronél Calisto Santos ‘Coliati’ hatudu kualidade pesoál, téknika no profisionál no mós virtude militár durante nia karreira tomak, hodi serve Instituisaun Militár no Nasaun. Kualidade sira ne’e hotu maka sai fatór determinante ba ninia nomeasaun, nu’udar Xefe Estadu Maiór.

Rate this item
(0 votes)

Independente Digital TV