Prezidente Konsellu Kombatentes Libertasaun Nasional, Vidal de Jesus “Riak Leman” hatete, orsamentu ba konstrusaun edifisiu Banku Nosso Futuro ho montante hamutuk millaun $5 mai husi fundus dezenvolvimentu veteranus.
Nia dehan, objetivu harii banku ne’e atu fasilita veteranus sira hodi bele asesu ba iha kreditu sira.
Nune’e mós, bainhira banku ne’e harii ona, tuir planu sei investe iha área agrikultura, pekuaria no peskas.
“Harii Banku do Nosso Futuro ne'e atu bele atende veteranus sira hodi bele halo kreditu no kolokasaun orsamentu ba konstrusaun Banku ne'e hamutuk 5 milloes,”dehan nia ba Jornalista sira, iha eis dolok, Komoro, Dili, Segunda (07/07/25).
Prezidente CCLN ne’e hatutan, kompañia ne’ebé sei toma konta ba iha konstrusaun ne’e maka kompañia BTK Timor, ho durasaun fulan neen.
Iha fatin hanesan, Ministru Assuntu Kombatente Libertasaun Nasional (MAKLN),Gil da Costa Monteiro “Oan Soru” hatete, atu harii banku ida hosi ninia prosesu inisiu mai to’o ohin loron realiza ona lansamentu fatuk-dahuluk ba edifísiu prinsipál ne’e ninian, la’os fásil.
Maibé nia dehan, labele hanoin buat ne’ebé defísil sai obskátulu.
Ministru “Oan-Soru” haktuir, bainhira nia sei hanesan sekretáriu estadu ba asuntus Veteranus iha mandatu VIII, nia halo konsultasaun haleu territóriu tomak, hahú hosi Aileu iha fulan-Outubru nia laran 2018.
Durante konsultasaun iha altura ne’ebá, Veteranu sira aseita ko’a sira-nian osan $30, maibé sira husu buat tolu bá Ministru “Oan-Soru”.
“Señor secretário do estado, ko’a ami nia osan, ami husu ita-boot, ida, harii banku ida ba ita-nian própriu iha rai ida ne’e. Rua, harii Ospitál ida ita-nian própriu, tolu, harii Universidade ida ita-nian própriu. No liuhosi estudu ne’ebé naruk, maibé, ohin, ita halo lansamentu bá konstrusaun edifísiu bá Banco do Nosso Futuro, iha futuru oin mai. Ne’ebé, apela bá hotu-hotu, perguntas no sujestasaun ne’ebé imi hato’o durante ne’e, ida maka agora ita realiza. La signifika, ita atu halo hotu-hotu dala-ida,” dehan Ministru Gil.
Entretantu, hafoin prosesu la’o no liu husi deliberasaun ida iha kongresu nasionál CCLN nian iha tinan 2019, hodi fó kbi’it ne’e bá nia hanesan sekretáriu estadu iha tempu ne’ebá, hahú ko’a sira-nian osan iha fulan-janeiru 2020.
“No ha’u hatán bá sira katak, ita labele halo buat hotu-hotu dala-ida, maibé, ita halo estudu para haree ida ne’ebé mak iha nia benefísiu ekonómiku, ita la’o uluk bá, depois ita haree sira seluk. Mais, ita labele promete borong hotu de’it. Ida ne’e mak iha ninia relasaun ho lansamentu primeiru-pedra ida ohin,” haktuir “Oan-Soru”.
