Xefe Suku Tekinomata, Postu Administrativu Laga, Munisipiu Baukau, Abilio Diamantino hatete, aldeia rua iha ninia suku presiza tebes atu loke fasilidade Saúde iha sira-nia fatin atu bele atende bainhira sira moras.

Tanba durante ne’e, bainhira komunidade sira moras, sira tenke lao ho distansia ne’ebé dook ba Postu Administrativu Laga hodi bele halo tratamentu saude.

"Komunidade sira bainhira moras sira la'o ho distansia ne'ebé dook, to'o iha sentru saúde Laga," dehan Xefe Suku ne’e ba jornalista INDEPEDENTE, iha nia kna'ar fatin, Samaguia, Sabadu (01/11).

Tan ne’e, Diamantino husu ba governu dasia atu realiza polítika kona-ba suku ida, postu saúde ida.

Aimoruk menus iha Postu Saúde Kom

Postu Saúde Kom, Lautém, durante ne’e hasoru difikuldade ba stok aimoruk.

Infermeira Deolinda Maria Monteiro informa, aimoruk sempre sai problema iha postu Saúde ne’e.

“Aimoruk iha ne'e kadavez iha no kadavez mós stok aimoruk laiha,” dehan nia, iha Kom, Sesta (31/10).

Problema ne’e, nia dehan, nia parte sempre relata ba parte relevante sira. Dala-ruma atende, maibé dala-ruma mós la atende.

"Ami halo relatoriu kada fulan sempre hato'o preokupasaun sira ne'e, dala-ruma iha rezultadu pozitivu, dala-ruma mós laiha resposta ba aimoruk ne'ebé laiha ne'e,” dehan nia.

Bainhira aimoruk laiha, nia dehan, obrigatoriu sira halo reseita hodi fó ba pasiente sira atu ba sosa iha apotik Lospalos villa.

“Se urijenti liu, ha'u tenke halo reseita fó pasiente ba sosa,"katak Nia.