“Kona-ba bee moos iha Suku Bairu-Pite, la’o di’ak, maibé komunidade hela iha foho leten mak seidauk hetan bee moos, tanba governu seidauk halo instalasaun bee ba komunidade sira, entaun seidauk hetan, sira kuru bee dok tebes,”dehan nia ba Online INDEPENDENTE iha knar fatin, Bairu Pite, segunda horseik (26/09).
Nia hatutan, komunidade ne'ebé hela iha rai tetuk no mós sira hela kleur ona iha suku refere, barak mak asesu ona bee moos, maibé iha tempu bai-loron, sira mós susar tebes atu asesu ba bee moos.
Nia dehan, relasiona ho preokupasaun komunidade sira nian ne’ebé balun la hetan bee moss, tan ne’e, iha suku refere, kuaze iha uma kain 95 mak halo ligasaun ba bee moos laiha kuiñesimentu, no mós balun uza saniu. Ida ne’e fó impaktu tebes ba komunidade sira seluk atu asesu ba bee moos.
Ho nune’e, nia parte husu ba Bee Timor-Leste, atu halo instalasaun bee ba komunidade sira ne’ebé hela iha foho leten no mós sira ne’ebé rai tetuk seidauk asesu ba bee moos.
Nia dehan, liga ho komunidade sira ne’ebé dade bee illegal ne’e, parte relevante sira identifika ona, nune’e ekipa tekniku husi Bee Timor-Leste, sei tesi kanu sira ne’ebé komunidade sira dada laiha koñesimentu.
Enkuantu, tuir dadus, Suku Bairu-Pite, iha Aldeia hamutuk 26, ho nia populasaun hamutuk 34.000 no xefe uma-kain hamutuk 5.000.
Entretantu, molok ne’e, Prezidente Komisaun Ezekutivu Bee moos Timor-Leste (BTL.EP), Carlos Peloi hateten, dadauk ne'e komunidade sira iha Kapital Dili ne'ebé asesu ona bee moos hamutuk 3.000.
Nia mós rekoñese katak, iha komunidade lubuk ida mak asesu ona bee moos uza sistema rasik, hanesan balun fura bee husi posu mak konsumu.
Tan ne'e, BTL sei nafatin esforsu atu mellora sistema bee moos ba populasaun sira iha Kapital Dili, atu bele asesu hotu bee moos.
Molok ne’e, Governu liu husi Ministru Finansas Rui Agostu Gomes asina akordu ho Banku Mundial, ba imprestimu osan dolar amerikanu U$120, hodi fornese bee moos ba populasaun sira iha Kapital Dili.
