Projetu Dekretu-Lei ne’e aprezenta husi Ministru Petróleu no Minerál, Victor da Conceiçao Soares, tanba relasiona ho situasaun ne’ebé akontese iha Ukránia, ne’ebé provoka aumentu substansiál ba folin petróleu, ne’e duni ho Diploma ne’e hakarak garante estabilidade presu kombustivel hodi evita konsekuénsia prejudisiál sira ba ekonomia no ba konsumidór sira.
Nia dehan, presiza títulu exesionál no tranzitóriu hodi halo intervensaun iha merkadu kombustivel, nune’e hamenus impaktu aumentu presu kombustivel ba transporte públiku no atividade fundamentál sira seluk ba ekonomia nasionál.
“Hare ba situasaun ne’ebé akontese iha Ukrania, provoka aumentu folin subtansial folin petroleum, tanba ne’e ita presiza duni titlu esesional trazitoriu atu halo intervensaun iha merkadu kombustivel. Subsídiu ne’ebé sei fó ba operadór transporte rodoviáriu públiku, ba operadór transporte aéreu no marítima nasionál sira no ba kompradór kombustivel ne’ebé maka destina ba atividade agríkola no peska nian, sei hanaran Voucher kombustivel,” dehan Ministru Prezidensia Konsellu Ministru (MPKM) interinu Ministru Rui Augosto Gomes, hafoin reuniaun Konsellu Ministru iha Palasiu Governu, Kuarta (13/04).
Nia informa, subsídiu ne’e sei halo liu husi vale diskontu nian ida atu uza iha estasaun sira ne’ebé maka faan kombustivel ho ninia montante ne’ebé korespondente 100% husi valór diferensa nian entre folin gazolina ka gazóleu litru ida, iha fulan dezembru tinan 2021, no folin gazolina ka gazóleo litru ida iha data fó sai voucher kombustivel ho konsiderasaun ba tipu kombustivel no ninia karakterístika sira.
Diploma ne’e válidu to’o loron 31 Jullu 2022, bele mós prolonga, karik kondisaun exesionál ba aumentu presu iha merkadu kombustivel kontinua la estavel.
“Voucher ida ne’e hanesan purezemplu iha presu kombustivel ka Gazolina litru ida purezemplu dollar U$ 1 mais derepente nia sae ba U$ 1.25 purtantu 0,25 sentavus ida ne’e mak sei subsidiu husi Governu, purtantu ita gonzela presu kombustivél ida ne’e mak intensaun husi dekretu lei ida ne’e,” tenik nia.
“Ita nia agrikultor sira, ita nia peskador sira ne’ebé utiliza motor Zonzon sira ne’e, Mikrolet, Angguna, Bus transporta públiku sira husi Dili ba Munisípiu sira ida ne’e mós sei hetan subsidiu, inklui mós ró ne’ebé halo viajen Dili Atauro no Oekusse ba mai,” tuir nia.
Ne’e para presu ida ne’e mós labele tranfere ba konsumidór sira, maibe estadu mak asegura, medida ida ne’e temporariu esesional to’o de’it iha fulan Jullu karik situasaun agrava liu tan mak sei haree fila-fali, karik presiza fila ba parlamentu nasionál atu halo ratifikasaun iha orsamentu.
Entretantu dekretu lei ne’e sei lori ba Prezidente Repúblika bainhira promulga ona governu bele implementa ona.
“Bainhira Prezidente Repúblika promulga ona dekretu lei ida ne’e ka veta ita la hatene, mak diploma ministériais sira mós sei prepara, purtantu Ministériu sira ne’ebé mak regula ida ne’e mak MPM rasik liu-liu ANPM, Ministériu Agrikul;tura, Ministériu Transporte Komunikasaun sira mak sei emite diploma ministériais para atu implementa dekretu lei ne’e,” tenik nia.
Antes ne’e, iha loron hirak liu ba Prezidente Asosiasaun Tane Konsumidor, Antonio Ramos husu Governu no aAutoridade kombustivel sira atu tuur hamutuk hodi foti medida lalais ba folin mina ne'ebé sa’e makas iha Rai laran.
Nia dehan, ema balun aproveita situasaun ida hodi hasae folin tuir sira nia hakarak, tanba ne'e tuir loloos estadu tenki tau atensaun, tanba tendensia mundial ne'e iha loron 7 Marsu nia atinji maximu 139 perbaril iha merkadu Londres.
"Ohin loron tun ona 137 pervaril, tanba saida mak iha merkadu nasional tun nafatin, ida ne'e Ita Nia Operador ekonomiku sira, Operador area setor kobustivel sira autoregulariza nia aan tanba ne'e mak Operador sira tenki tau atensaun," dehan nia liu husi konferensia imprensa foin lalais.
Nia hato'o deklarasaun sira ligadu ba folin merkadu internasional ne'ebé sa’e, mesmu iha loron 7 Abril komesa tun uitoan ona, maibé autoridade sira tenke kontrola maka'as.
