Ministra Finansas Santina José Rodrigues F.V. Cardoso hatete, orsamentu ne'ebé Konsellu Ministru (KM) aprova, montante totál despeza nian, ne'ebé relasiona ho títulu orsamentál ida-idak kona-ba OJE 2024.
Montante ida-ne’e reflete redusaun 18%, ekivale ba dolar amerikanu hamutuk millaun $360, kompara ho OJE tinan 2023.
"Tetu agregadu dolar amerikanu hamutuk biliaun $1,6 inklui dotasaun ida husi dolar amerikanu hamutuk $1.458.292.345 ba administrasaun sentrál, dolar amerikanu hamutuk $81.707.655 ba seguransa sosiál no dolar amerikanu hamutuk $60.000.000 destina ba Rejiaun Administrativa Espesiál Oekusi Ambenu. Valór ida-ne’e la inklui Fundu Rezerva Seguransa Sosiál nian, ho montante hamutuk dolar amerikanu $162.007.651.,"dehan nia iha Palásiu Governu, (02/10).
Ministra afirma, ho valór totál OJE tinan 2024, parsela husi $400.276.781 sei aloka ba saláriu no vensimentu, hodi reprezenta ba redusaun husi pursentu 14% iha relasaun ho tinan 2023.
Enkuntu ho valór montante dolar amerikanu $254.767.075 ba beins no servisu, hodi reflete diminuisaun husi 36% kompara ho OJE tinan 2023.
"Ba despeza kapitál menór, prevee ho montante dolar amerikanu $247.320, enkuantu ba kapitál dezenvolvimentu dolar amerikanu milloens $177.606.384, ne’ebé koresponde ba redusaun husi pursentu 14% no 23%, ida-idak," dehan Governante.
Governante akresenta, Governu prevee dotasaun ida $767.102.440 ba transferénsia públika, ne’ebé reprezenta redusaun ida husi 13% kompara ho OJE tinan 2023.
Nia dehan, ba entidade públika sei finaliza sira nia proposta orsamentu, hodi bele análiza husi Komité Revizaun Orsamentál loron 23 outubru to’o loron 9 fulan-novembru.
Nune’e, mós prevee katak projetu proposta Lei OJE tinan 2024 bele aprova husi Konsellu Ministrus to’o Loron 14 fulan-Novembru tinan ne’e no sei entrega ba Parlamentu Nasional to’o loron 24 fulan-Novembru 2023.
