Maibé, husi montante orsamentu ne’e seidauk sufisiente atu reativa programa baixa iha klinika ne’e rasik.

Diretór Klinika Bairru-Píte, Inacio dos Santos hateten, iha kuarta semana fulan kotuk kotuk, klinika halo pedidu pagamentu ba Diresaun Nasionál Planu Finansas MS nian to’o kuarta semana ne’e, tuir informasaun pedidu ne’e hatama ona ba MF no semana ida ne’e nia laran halo transferénsia ba klínika.

“Orsamentu ne’ebé prevee, la sufisiente atu loke fila-fali programa baixa, maibé ita nia populasaun barak mak ejize atu bele partu iha klinika ne’e tanba sira toman ona halo tratamentu iha ne’e,” nia hateten iha Klinika Bairru-Pité, Kinta (30/06).

Tanba ne’e, klinika sei haree posibilidade reativa partus, maibé husu populasaun tenke fó kontribuisaun ba kustu operasaun balun, hanesan bainhira loke partu persiza minimu na’in-ualu, maibé fundu ne’ebé iha kobre de’it na’in-haat, entaun restu ne’e foti fundu iha ne’ebé.

“Entaun populasaun tenke kontribui liu husi partus fó $ 10-20 hodi selu saláriu vensimentu ba parteira sira, tanba ita haree katak, orsamentu ne’e sei kobre de’it ba fulan tolu nia laran,” nia hateten.

Tanba, haree husi montante orsamentu $68.000.110 ne’e seidauk sufisiente hodi kobre atividade saúde iha klinika, tanba fulan fahe saláriu ba funsionáriu hamutuk $27.000, seidauk sura ho operasaun seluk.

Daudaun ne’e, klinika halo ezersisiu boot hodi halo aproximasaun ba Gabinete Primeiru Ministru atu bele apoia fundu balun.

Espera iha tempu badak bele hetan, nune’e mós klinika buka solusaun husu ajuda ba Matebian Doutor Daniel nia maluk sira iha Amérika hodi buka angariasaun fundu hodi bele ajuda klinika.

Daudaun ne’e klinika hanoin hela posibilidade maski estatutu ne’ebé klinika rejistu iha Ministériu Justisa la ko’alia kona-bá buka lukru, maibé klinika halo aproximasaun ho membru Konsellu tomak iha posibilidade halo lukru hodi halo sirkulasaun klinika ne’e la’o beibeik.

Hanesan, bainhira pasiente sira mai halo konsulta iha klinika no ai-moruk laiha, entaun klinika kompras medikamentu hafoin pasiente sosa fali klinika nia ai-moruk, do que klinika fó reseita ba pasiente hola ai-moruk iha farmasia privada ho kustu ne’ebé boot.

Totál rekursu umanu ne’ebé daudaun ativu halo atendimentu iha klinika ne’e hamutuk  na’in 42 no funsionáriu na’in 50-resin mak klinika hapara tanba de’it orsamentu la to’o.