Prezidente Konsellu Imprensa (KI) Virgilho Guterres hateten, KI halo ona diskusaun ho asosiasaun jornalista sira, média no jornalista senior sira no maioria aseita atu foti loron 16 Outubru sai hanesan Loron Nasionál ba Liberdade Imprensa.
"Membru foun husi Konsellu Imprensa ne'ebé sei tama mai mós sei kontinua nafatin hanoin ida ne'e liu-liu atu lori hanoin ne'e ba iha orgaun kompetente sira hanesan Parlamentu nomós governu atu konsidera no deklara hanesan Loron Nasionál Liberdade Imprensa nian" dehan Prezidente KI iha nia knaar fatin, Ohin (07/10).
Nia relata liuhusi konsultasaun ne'ebé Konsellu Imprensa (KI) hala'o ona maka deside loron Balibo Five ne'ebé monu iha loron 16 fulan Outubru hanesan Loron Nasionál Liberdade Imprensa. Tanba ne’e hanoin sira ne'e diskuti tika ona no hein de'it atu follow up fali ba iha instituisaun estadu sira.
Entretantu Prezidente Asosiasaun Jornalista Timor Leste(AJTL) Jevonia Veira hateten, KI halo ona konsultasaun ho assosiasaun jornalista no hotu-hotu inklui AJTL kona ba loron saida maka ita bele deside hamutuk atu sai loron Nasionál Liberdade Imprensa no hotu-hotu konkorda ho loron 16 fulan Outubru atu sai loron Nasionál Liberdade Imprensa iha Timor.
"Loron ida ne'e importante tebes ba ita tanba hahú husi ne'ebá maka jornalista sira hahu hakerek problema kona ba Timor nian" dehan nia.
Jevonia hateten, loron ida ne'e importante tebes atu komemora jornalista na’in 5 nia mate no ita fó rekunesimentu ba sira nia mate hodi komemora loron ne'e sai hanesan loron nasionál Liberdade Imprensa
