"Ha'u husu atu aumenta polísia sira nia saláriu, sira ne'ebé maka la'o 24 horas tenke fó perdiem ba sira ha'u rasik mós hare ho matan servisu bo’ot tebes maka polísia sira ne'e ona" dehan Xefe bankada KHUNTO, Olinda Guterres iha Parlamentu Nasional, Kuarta (07/10).

Nia hateten polísia sira ne'e nia serbisu todan no risku tebes-tebes, deputada ne'e husu atu Ministériu Interior tenke tau matan ba maluk sira ne'ebé serbisu iha area seguransa nian liu-liu ba sira ne'ebé husik nia família  hodi serbí ba povu no nasaun iha instituisaun seguransa. Nia  preokupa ho fasilidade sira ne'ebé polísia sira uza hanesan farda no sapatu, tuir nia polísia sira barak maka sosa rasik sapatu no farda hodi uza troka malu.

Nia afirma governu tenke tau matan ba polísia sira hodi aumenta sira nia osan iha orsamentu estadu tanba dala barak polísia sira la halo servisu ho di'ak tanba la iha fasilidade ne'ebé ajuda.

"Tenke aumenta sira nia kareta dala barak problema akontese, problema ne'e hotu ona mak foin polísia to’o tanba kareta la iha" tenik nia.

Hatan ba asuntu ne'e Vise Ministru Interior (VMI) António Armindo hateten, kona ba saláriu no perdiem rejime salarial ba PNTL dadaun ne'e hala'o hela diskusaun iha Ministériu Interior no governu ne'e husu atu deputadu sira bele fó apoiu ba polítika ne'e.

"Rejime salarial ba PNTL dadaun ne'e iha hela diskusaun Ministériu Interior tanba ne'e husu ba ita hotu ninia apoiu tanba la'ós ami nian mesak de'it husi na’in deputadu sira iha Parlamentu Nasionál atu ita bele hadia instituisaun PNTL ba oin" dehan nia.

Nia hatutan kona ba farda no ekipamentu sira ne'ebé apoiu PNTL atu hala’o sira nia servisu, nia parte rejista hela no husu entidades hotu nia apoiu hodi bele dezenvolve instituisaun seguransa ne'e bele sai di'ak liu tan iha futuru.