Ministra Solidariedade Sosial no Inkluzaun, Veronica das Dores hatete, programa bolsa da mãe kondisional nu'udar programa governu nian ne’ebé kontinua implementa hahú husi tinan 2008, bazeia ba dekretu lei númeru 18/2012, 4 abril no dekretu lei ne'e hetan alterasaun iha fulan-Janeiru 2024, tuir dekretu lei númeru 1/2024, 3 janeiru hodi halo mudansa ba montante orsamentu ba estudante ka benefisiariu sira iha dekretu lei anterior iha artigu 10 no 11.
Nune’e, subsidiu ba estudante benifisiariu bolsa da mãe sira, husi ensinu báziku siklu dahuluk no daruak iha hetan $8. Estudante sira husi Ensinu Báziku siklu datoluk $9. Estudante sira husi Ensinu Sekundáriu Jerál no Eninsu Tékniku Vokasional $10 no estudante ne'ebé ho kondisaun defisiénsia sei hetan tan adisionál $5.
"Nune'e, ohin, iha 24 Juñu 2025, Ministeriu Solidariedade Sosial no Inkluzaun aprova lista benefisiáriu sira ne'ebé elijivél iha faze dahuluk, ne’ebé sei hahú iha fulan-jullu ne’e nia laran, bazeia ba tetu orsamentu 2025, orsamentu ne’ebé MSSI aloka ba programa bolsa da mãe . hamutuk montante $7,000,080.00.
Husi montante orsamentu ne'e, MSSI sei halo pagamentu ba faze dahuluk nian ho montante orsamentu $4,199,708.00 ba estudante benefisiáriu sira ho totál hamutuk 40.279.
Tuir dadus husi Ministeriu Solidariedade Sosial no Inklusaun (MSSI) ho Ensinu Báziku siklu dahuluk no daruak hamutuk 20,178 ho nia orsamentu $ 1,952,866.00, Ensinu Báziku Siklu Datoluk hamutuk 14,994 ho nia $ 1,629,864.00. Ensinu Sekundáriu Jerál no ensinu tékniku vokasionál hamutuk 5,107 ho nia osan hamutuk $ 616,978.00.
Governante ne’e esplika, husi númeru benifisiariu na’in 40.279 kompostu husi Aileu iha benifisiariu 2.757, Ainaro 3.361, Atauro 552, Baukau 3.925, Bobonaro 3.796 , Kovalima 3.737, Dili 1.917, Ermera 3.628, Lautem 3.348, Likisa 2.650, Manatuto 2.964, Manufahi 2.618, Oekuse 3.565 no Vikeke iha benifisiariu na’in 1.461.
Entretantu, iha biban ne’e, Ministra Solidariedade Sosial no Inkluzaun Veronica das Dores apela ba públiku katak, hahú loron 1 jullu 2025,MSSI sei halo rejistu foun ba tutor no benefisiáriu estudante sira iha territorio Timor-Leste.
Aliende ne’e, MSSI husu ba fámilia benefisiáriu sira, bainhira pagamentu iha Jullu mak ema balun naran laiha ka la konsege simu, bele hato'o reklamasaun mai MSSI hodi nune'e bele ajusta ba pagamentu faze daruak nian neʼebé sei hala'o iha trimestre ikus 2025.
