Jornalista na’in rua, Mariano Mendonça Benevides, nudar manan na’in premiu feature news di’ak liu ba kategoria Saudozu Francisco Borja da Costa no Jonio da Costa, nudar manan na’in premiu foto jornalismu diak liu ba kategoria Bernadinho Guterres (Bedinho Guterres).
Premiu Konsellu Imprensa 2021 ne’e, dedika ba jornalista na’in tolu, na’in rua husi diariu Independente, na’in ida seluk husi jornalista Radio Televisaun de Timor-Leste (RTTL).
Enkuantu jornalista husi RTTL, Constancio dos Santos Vieira ne’ebé konsideradu nudar vensedór ba kategoria Greg Shackleton, ho nia obra jornalistiku “Direitu Labarik Violadu”.
Perfil Mariano Mendonça Benevides
Hahú kursu jornalizmu iha Jornal INDEPENDETE iha fulan-Jullu-Setembru tinan 2019. Hafoin remata kursu kontinua no halo kedas estajiu fulan tolu nia laran, komesa husi fulan-Outubru-Dezembru.
Hahú servisu iha diariu Independente nudar jornalista iha fulan Jullu 2020. Hakerek feature news iha fulan-Outubru 2020.
“Biban ida ne’e ha’u hakarak agradese ba Jornal INDEPENDETE, tanba durante ne’e muda tebes ha’u nia mentalidade, tanba bele lori ha’u hetan premiu husi Konsellu Imprensa maske kiik maibé ida ne’e boot tebes, entaun ha’u hahu iha vontade foti tema kona-ba problema sosial, iha buat rua husi tema ne’ebé dadauk ha’u hetan premiu mak vantajen no desvantajen iha sosiedade nian moris, dala barak labarik idade minoridade mak hasoru problema ne’e”.
“Ha’u hanoin ida ne’e presiza tebes, oinsa mak bele loke ema hotu nia hanoin, atu ita nia alin sira ho idade sei minoridade labele monu ba risku ida ne’e hodi abandona fali sira ninia estudu, tanba bu’at ne’ebé ha’u foka liu ba labarik ne’ebé buka moris iha dalan,”hatete Mariano iha ambitu komemorasaun loron Balibo Five, 16 Outubro 2021, Sabado iha Balibo.
Perfil Jonio da Costa
Hahu servisu iha diariu Independente iha fulan Juñu 2019, nudar Fotografu.
Molok ne’e halo knar nuudar Fotografu no videografer iha kompañia Audivizual Timor Video Maker Independent (TVIN) iha tinan 2015 to’o 2018.
“Iha loron 29 Setembru 2020 ha’u hasai foto interese umanu nian ida iha parte supermerkadu pateo nia sorin iha Dili ne’ebé negosiante inan feton ida ho naran koñesidu Maria Bani-Bén ne’ebé durante tinan barak nia laran nia leba Bani-Bén no la’o ain husi Postu Administrativa Remexio, Munisípiu Aileu hodi faan tutuir dalan mai para fatin iha area Pateo Kolmera,”nia konta tuir.
Foto ida ne’e lori Jonio nudar jornalista Independente sai vensedór ba premiu Konsellu Imprensa tinan 2021.
Entretantu, iha tinan kotuk (2020), Jornal INDEPENDENTE hetan premiu husi Konsellu Imprensa nuudar Media ne’ebé diak liu iha Timor-Leste, hodi halakon media boot sira hanesan Suara Timor-Lorosa’e, Timor-Post, Grupo Media Nasional (GMN) no media sira seluk.
