“Horikalan, hau toba ona, hau rona informasaun husi hau nia oan mane, sai husi nia kuartu mai fanu hau katak Apa, Tiu Lú laiha ona, hau rona ida ne’e hau mos ita sente sokadu oituan, tanba uluk ami hamutuk iha ne’e nia saude diak hela, nia hau haree hela, nia rekopera rona oituan, maibe derepenti rona dehan nia mate ona,” Dehan Jenerál Reformadu Lare, iha Rezidénsia Saudozu Lú Olo, Faról, Segunda (22/06).
Maibé horseik ka hori-bainrua, Jeneral Reformadu ho katuas Marí, Sekretáriu Jerál FRETILIN, nia iha Malázia, sira rua kontaktu malu, Kamarada Marí dehan katak kamarada Lú nia situasaun grave teb-tebes.
“Iha momentu ne’ebá hau preokupa ona, la buat ida, mate ne’e distinu. Ita labele sees, mate, mate ona. ita mak sente falta, iha familia laran, foin mai husi ailaran, tinan 24 nia laran, nia haree tiha nia familia, oan mane na’in tolu no feto ida, kuitadu nia sedu liu husik oan kiak sira ne’e,” Lere espresa.
Hasoru malu ikus iha fulan maiu, Nia parte hasoru ho Saudozu Lú Olo, Maun Taur, Falur Rate Laek, Filomeno Paixao, iha Maun Taur nia rezidénsia no iha 20 maiu iha Tasi-tolu.
“Ami hasoru dala rua, primeiru iha hau nia rezidénsia, segundu iha rezidénsia maun Taur ninian, haree nia saude diak hela, hau admira, ninia oin ne’e, oin seluk, la hanesan uluk, ita bele dehan nia oin nurak, hau haree katak nia sente rekoperadu ona, hau konta katak nia diak ona, maibe derepenti deit hau rona katak nia ba ona Malázia, hau hanoin katak nia ba hanesan baibain ba halo ceck-up mais depois ikus mai hau rona katak liu husi Maun Marí dehan katak nia estadu grave, ida ne’e mak hau preokupa,” Nia hato’o.
