Sira na’in rua iha oan na’in sia (9) kompostu husi mane na’in lima (5) no feto na’in haat (4).
Husi oan na’in sia (9) ne’e, na’in hitu (7) mak eskola ona, na’in rua (2) iha nivel sekundaria, na’in rua (2) seluk iha nivel pre-sekundaria no na’in tolu (3) iha foin nivel primaria.
Jacinta haktuir, durante tinan ida ho balun ona nia buka moris liu husi faan fatuk tasi no ahu-ruin iha dadan públiku area tasi ibun Pantai Kelapa nian, nune’e hodi hetan netik osan uituan hodi sustenta ba nesesidade uma-laran.
Nune’e, laiha dalan seluk hakarak ka lakohi tenki faan duni, maske semana ida ka rua mak ema foin hola, maibé familia kiik ne’e la senti kolen hodi habai-an iha loron manas no udan laran hodi hein osan atu mai.
Nia hatete, fatuk no ahu-ruin sira ne’ebé faan hein laloran tasi lori sai hafoin sira hili tau hamutuk hodi faan.
"Fatuk tasi ho ahu-ruin ne'ebé ami hili bainhira laloran tasi dudu sai mai iha tasi ibun mak ami foin hili, no fatuk ne'ebé ami faan ami hada tuir nia ret no ret ida ho dolar amerikanu $20, maibé kuandu ema hakarak hola depende de'it ba hola na’in, hakarak fo de'it dolar amerikanu $10 labuat ida ami fo de'it,”dehan nia iha tasi ibun Pantai Kelapa, tersa ne’e (14/09).
Nia konta tuir, sira faan loron-loron hahú husi tuku 08.00 too tuku 06.00 loraik.
Justino Ximenes Ribeirro hanesan laen kaben, senti triste hanesan inan-aman laiha servisu ho situasaun ne'ebé defisil tebes atu hetan osan, maibé nafatin agradese tanba liu husi faan fatuk tasi ho ahu-ruin ida ne'e bele rejolve ona nesesidade oan sira nian iha uma laran.
Nia akresenta, bainhira faan fatuk ne’e iha situasaun uluk ho agora ba sira laiha diferensia tanba ema sosa bainhira nia presiza duni, maibé ida lasai sasukat ba sira tanba husi ida ne'e mak sustenta familia no hare oan sira nia futuru.
Asistente Editor: Saturnina da Costa
