Investór hosi nasaun tolu ne’e aprezenta direta planu investimentu iha área agrikultura, finansas no aviasaun bá Primeiru-Ministru (PM), Kay Rala Xanana Gusmão, ne'ebé akompaña hosi Vise-Primeiru-Ministru Asssuntus Ekonómikus, Francisco Kalbuadi Lay, Ministra Finansas, Santina Cardoso, Ministru Planeamentu no Investimentu Estratéjiku, Gastão Sousa no Vise-Ministru bá Infraestruturas, Júlio do Carmo.
"Ami realiza enkontru ida espesiál ho maluk investór sira husi Xina, Honkong no Singapura. Sira aprezenta investimentu iha área oioin, hanesan finansas, agrikultura no aviasaun nian. Enkontru ne’e rasik lidera direta hosi Primeiru-Ministru, Kay Rala Xanana Gusmão,” dehan Ministru Planeamentu no Investimentu Estratéjiku(MPIE), Gastão Sousa hafoin enkontru, iha Palásiu Governu, Sesta (16/01).
Ministru Gastão haktuir, planu investimentu iha área agrikultura ne’e, investór sira aprezenta liu-liu kona-bá atu kuda espésie dut ida ne’ebé ho nia rezultadu atu utiliza bá buat barak. Ezemplu bele sai hanesan hahán bá animál sira no mós bele prodús produtu sira seluk tán.
Kona-bá investimentu iha área aviasaun no finansiál, durante enkontru ekipa diskute atu hanoin bá oin tanba Governu rasik estabelese ona Banku Dezenvolvimentu Nasionál, oinsá sira-nia partisipasaun iha dezenvolvimentu seitór finanseiru hodi bele ajuda pequenas no média empreza sira iha Timor-Leste.
"Governu halo hela análiza atu haree oportunidade saida mak bele aproveita hosi projetu investimentu hirak ne’e,” Dehan Ministru ne’e.
Iha enkontru ne'e, Nia adianta, Primeiru-Ministru fó ona orientasaun bá Ministériu tutelada sira liu-liu sira ne’ebé partisipa iha enkontru ne’e atu haree oportunidade bá estabelesimentu kooperasaun iha área interessada ne’ebé aprezenta ona.
Reprezentante investór, Michael Ong hatete, sira kontente tanba governu Timor-Leste bele simu sira hodi mai aprezenta planu investimentu, atu oinsá bele servisu hamutuk ho Timor-Leste ba oin.
“Agradese ba Primeiru Ministru nia tempu no mós Ministru sira seluk, espera hasoru malu ida-ne'e ita sei servisu hamutuk ba oin ho di'ak,” Tenik Investor Michael.
Aliende enkotru ho parte Governu, investor hirak ne’e kontinua hasoru malu ho Prezidente Repblika, José Ramos Horta hodi ko’alia kona-ba planu investimentu estratéjiku ne'ebé atu apoiu dezenvolvimentu ekonómiku iha Timor-Leste.
Delegasaun ne’ebé lidera husi Michael informa, PR Horta kona-ba sira nia kontatu no sorumutu foin lalais ne'e ho Primeiru Ministru, Kay Rala Xanana Gusmão, hanesan mós ho Ministériu relevante sira, iha ámbitu preparasaun no implantasaun inisiativa, elevadu sira ba impaktu ekonómiku no sosiál.
“Iha setór agrikultura, delegasaun sira aprezenta proposta atu introduz teknolojia "Juncao", métodu inovadór ida husi kultivu ne'ebé sustentável ho objetivu, atu prodús hahán animál no produtu esensiál sira seluk. Planu ne'e sei hahú ho faze pilotu durante fulan-tolu, antes kobre eskala ne'ebé boot liután. Iha kuadru kapasitasaun nasionál, investidór sira hato’o sira-nia disponiblidade atu apoia bolsa-estudu ba estudante Timor-oan sira hodi aprende teknolojia ne'e iha Xina no hodi estabelese iha futuru baze formasaun ida ne'ebé permanente iha Timor-Leste hodi kapasita agrikultór lokál no setór privadu sira,” Informa Michael ba jornalista sira, hafoin enkontru ho PR Horta iha Palásiu Prezidensia Bairo-Pite, Sesta (16/01).
Iha enkontru ne'e mós ko’alia kona-ba proposta signifikativu sira iha aviasaun no finansas, inklui planu hodi aprezenta aviaun Airbus A320 rua hodi hametin ligasaun nasionál, liu husi parseria ho Aero Dili ka liuhosi husu Sertifikadu Operadór Ar (AOC) foun.
Hafoin konsulta ho Banku Sentrál, delegasaun ne'e aprezenta planu ba kuadru mikro-finansas ida ne'ebé atu fornese asesu kréditu ne'ebé di'ak liután ba empreza ki'ik no média sira (PME).
Entretantu, iha enkontru ne'e Prezidente Repúblika, José Ramos Horta hatudu ninia satisfasaun boot ho progresu ne'ebé iha no simu ho haksolok potensiál husi investimentu sira ne'e hodi kria kampu servisu no moderniza nasaun nia infraestrutura.
