Koordenadór Gabinete Kurríkulu Unidade Nasionál Ministériu Edukasaun, João Maupelu hatete, eleborasaun ba pontus ezame nasionál termina ona, tanba ne’e tuir planu sei imprime iha inisiu fulan setembru ne’e.

“Ita la'o tuir kalendáriu ne'ebé iha ona, no  planu ne'ebé iha katak loron-8 setembru ne’e, hahú imprime pontus ezame nasionál, nune'e iha loron-20 fulan outubru realiza ezame nasionál,” Dehan João Maupelu, ba jornalista sira iha salaun Ian Martin  INFORDEPE, Kinta (28/08).

Nia informa, prosesu eleborasaun hotu ona no agora iha faze revizaun kualidade kontrolu ba pontus refere no  besik  finaliza.

“Prosesu elaborasaun ba pontus ezame nasionál ne'e hotu ona, maibé agora ita iha  faze revizaun ba matéria, maibé besik atu finaliza ona,” Nia informa.

Kona-ba imprime pontus ezame ba tinan ne’e, Maupelo informa, sei imprime de’it iha sentru imprensaun Ministériu Edukasaun nian.

"Tinan ne'e ita imprime pontus ezame nasionál iha sentru imprensaun ministériu edukasaun nian, tanba  prosesu imprime ne'e durante loron 40 nia laran, nune'e iha 17 outubru ita atribui no 20 realiza ezame nasionál,” Kata nia.

Tuir nia, dadus provizóriu lista finalista ne'ebé ministériu edukasaun rejista tantu ensinu báziku no ensinu sekundáriu hamutuk 54.000.

Aleinde ne’e, ba ensinu báziku ezame nasionál loron tolu no sei kontinua ezame lokál,  depoiz ba ensinu sekundária ezame nasionál loron 4 no kontinua kedas ba ezame lokál.