Enkuantu asaun polisia halo kapturasaun ba sidadaun ne’e mós viola regra serka sanitaria tanba halibur sidadaun barak ba fatin ida iha komandu Munisipiu Dili la tuir distansia sosial.

Tuir observasaun Online Independente hatudu katak, sidadaun kuaze na’in 233 ne’ebé polisia lori ba halibur hamutuk iha Komandu PNTL Munisipiu Dili, Kaikoli.

Iha fatin ne’ebé polisia halibur sidadaun ne’e la tuir regra distansia sosial kuaze metro ida resin. Sidadaun sira ne’e tuur tuir liña ne’ebé polisia orienta hodi hetan sensibilizasaun kona-ba regra estadu emerjensia.  

Entretantu, Segundu Komandante Polísia Munisípiu Dili, Superintendente Euclides Belo ba jornalista sira, domingo ohin hatete, sidadaun hirak ne’ebé polísia kaptura iha fatin la hanesan, sidade Dili barak liu sira ne’ebe halo jinastika.

Komandante Belo hatutan, sidadaun sira ne’e lori ba Komandu Munisipiu Dili, Kaikoli, hodi halo prosesu identifikasaun.

Tuir regra sira hatúr katak bandu sidadaun hotu halo movimentasaun sira exeptu ba hola aihan, ba ospital no situasaun emerjénsia sira, no tenke uza maskara.

“Ami foti sira iha Dili laran, balu iha Palásiu Governu oin, Largo Lesidere, Pantai Kelapa, no fatin seluk tanba sira dezobidensia ba regra,” Euclides hateten.

Sidadaun sira ne’e polísia lori hodi halo identifikasaun no tetu ba liberta ka kumpri tama sela.

Euclides apela ba sidadaun hotu atu tur hakmatek iha uma hodi prevene moras daet COVID-19 no fó oportunidade ba ekipa saude no seguransa sira hala’o servisu ho di’ak liu.

Entretantu Governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili durante loron-hitu hahú husi loron Tersa (09/03/2021) to’o loron Segunda (15/03/2021).

Ministru, Ministru Prezidénsia Konsellu Ministru (MPKM) Fidelis Leite Magalhães haktuir, durante serka sanitaria, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk,  aihan no seguransa.

Bandu mós halo atividade kulturais, reliziosa, desportivas, no atividade sira ne’ebé halibur ema barak durante periodu serka sanitaria iha Dili.