Diretór Servisu Apoiu Diagnóstiku no Terapêutika iha HNGV, Vidal Lopes hatete, dadaun ne’e konstrusaun la'o hela hanesan pediatria andar lima ne’ebé sei inaugura iha Dezembru tinan ne’e hodi bele repsonde ba situasaun overload ne’ebé mak loron ba loron aumenta hela deit.
“Ami sei tenta nafatin alternativa sira hotu ne’ebé mak bele hodi fó resposta ne’ebé mak diak ba bem estar komun ba pasiente nian, atu nune’e pasiente hotu iha kondisaun ne’ebé mak di'ak,"dehan Diretór Servisu Apoiu Diagnóstiku no Terapêutika iha HNGV, Vidal Lopes, bá Jornalista sira iha nia kna'ar fatin, Kuarta (24/09).
“Ita iha estratéjia ida tenke muda duni departamentu ka unidade balun ba lahane, entaun Ministériu Saúde oferese ona fatin, ita tenke utiliza espasu ne’e, tanba agora dadaun ami deside ona katak departamentu ka unidade balun ne’ebé mak presiza muda ba ne’ebá no servisu balun bele konsentra ona iha Lahane,” nia afirma.
Tentantiva dahuluk ne’e, muda uluk unidade paliativu, tuir mak departamentu moras hadaet ka izolamenttu signifika, pasiente sira ne’ebé mak problema pulmaun ka Tuberkuloze sira ne'e sei muda hotu ba Lahane hodi halo tratamentu iha ne’ebá ho fazeadamente.
“Ita muda ona unidade sira ne’e ba Lahane tuir fazeadamente, tanba ida ne’e relasiona ho ema nia moris, tenke kria uluk kondisaun mak hafoin muda ba, entaun preparasaun sira ne’e preparadu ona hein foti desizaun sira, semana oin ka fulan oin ita bele muda ona, atu muda pasiente ba Hospitál Antonio Carvalho Lahane," nia haktuir.
Parte HNGV halo ona enkontru jerál ida iha semana kotuk, hamutuk ho Diresaun Nasionál Hospitalar husi Ministériu Saúde nian ho parte relevante sira katak, tempu badak sei muda uluk mak pasiente sira ho kategoria kuidadu paliativu.
“Emprinsipiu sei transfere pasiente ho fazeadamente sei muda fali ba Lahane atu nune’e espasu bele iha, tanba ita-nia espasu mak laiha hanesan agora daudaun iha pediatria ne’e, ita bele foti fali desizaun, tanba ita nia númeru populasaun no partu aumenta no númeru transferensia aumenta mai hotu HNGV, nune’e ita nia espasu mak limitadu duni,” nia esplika.
Kona-ba rekursu umanu, Vidal dehan, HNGV uza deit profisionál saúde sira ne’ebé mak dadaun ne’e iha.
Antes ne'e konsellu Diretivu enkontru ona ho Servisu Nasionál Ambulánsia Emerjénsia no Médikamentu halo ona enkontru atu bele muda pasiente sira ba Hospitál António Carvalho Lahane.
