Diretór Ezekutivu HNGV, Alito Soares hateten, to’o oras ne’e kama fixu hamutuk 283, hafoin iha momentu situasaun Covid-19 liuliu iha tempu Omicron nian, HNGV junta kama to’o 421.
"Maibé iha departamentu Interna Medisina, ICU ninian, loos duni kama ne'ebé fixa neen de'it. Maibé númeru pasiente ne'ebé persiza asesu ba ICU nian ne'e kontinua aumenta," nia hateten iha knaar fatin, HNGV, Sesta (25/03).
Tanba ne'e, mak alternativu ne'ebé Hospitál foti iha Hide Dependensia Unite (HDU) ne'ebé instala hotu iha departamentu rua mak hanesan, Departamentu Interna Medisina no Departamentu Sirurjia.
Kama 7 mak rai ba HDU, nune'e bainhira pasiente nakonu iha unidade ICU, pasiente seluk médiku sira transfere ba iha HDU rasik ho kondisaun másimu persija prienxe atu bele halo tratamentu.
Oras ne’e daudaun Hospitál mós planeia atu bele hare'e asuntu ne’e mak hanesan, daudaun ne'e Hospitál instala tán ona Unidade Kardio Care ne'ebé seidauk finaliza, bainhria hotu bele utiliza ba kazu ICU nian.
Rekursu umanu no ekipamentu atu fasilita ne'e maka, daudaun fó hela treinamentu ba pessoál saúde sira ne'ebé iha HDU atu bainhria ICU nian hotu ona bele halo atendimentu ho di'ak iha ne’ebá.
Molok ne'e, Xefe Departamentu Medisina Intensivista (ICU), Vital Lopes de Jesus hateten, durante tinan naruk ona Hospitál Nasionál liu-liu iha Sala Intensive Care Unit (ICU) iha de’it kama neen, hodi responde ba kazu iha Timor laran tomak, difísil tebes atu akomoda pasiente ho númeru barak.
