Ministra Veronica hatete, tuir kontratu termos certo labele aumenta ema-nia salariu tinan ida dala tolu ka dala haat.

Maibé, nia dehan, iha INSS mosu pratika ne’e hodi aumenta salariu ba protokolu tinan ida to’o dala tolu ka dala haat.

“Tanba ita kuandu halo avaliasaun ba ema, tuir ha’u-nia kompriensaun katak avaliasaun ne’e pur ano laos pur mes. Laos fulan ida, fulan rua liu ita halo avaliasaun, aumenta salariu, fulan ida-rua liu ita aumenta salariu,” dehan Ministra Veronica ba Jornalista sira, iha salaun MSSI, Kaikoli, Kuarta (21/01).

Entretantu, desizaun ba ezonerasaun ne’e deside iha Konsellu Ministru iha 7 Janeiru 2026, bazeia ba projetu rezolusaun Governu ni'an ne'ebé aprezenta husi Ministra Verónica.

Arlindo kontra

Iha parte seluk, eis Prezidente INSS, Arlindo Pinto hato’o reasaun forte no halo akuzasaun direita ba Ministra Veronica.

Tuir Arlindo, Ministra Veronica “bosok publiku” no uza nia poder atu halo intervensaun politika ba instituisaun autonomia.

Arlindo esplika, INSS no Fundus Rezerva Seguransa Sosiál (FRSS) nu’udar instituisaun publiku ho autonomia finanseira ne’ebé tutela de’it ba membru governu tutelalaos integradu direitamente iha administrasaun MSSI.

“Administrasaun INSS no FRSS nu’udar sub-setor finanseiru ketak ida husi Administrasaun Sentral. INSS no FRSS implementa no ezekuta administrasaun ho independente no halo koordenasaun de’it ho ministériu tuteladu,” dehan nia.

Hafoin tinan rua, Arlindo hatete, serbisu administrasaun sira lao di’ak maibé iha fulan tolu ikus tinan 2025, Ministra hahú boikota Administrasaun INSS no FRRS nia ezekusaun.

“Ministra nia hakarak buat hotu tenke integra ba MSSI, nune'e ha'u-nia intervensaun katak INSS no FRRS instituisaun publiku hodi asegura nafatin atendimentu publiku ba rejime kontribuitivu nian,” dehan Arlindo ba Jornal INDEPENDENTE via telefone, Kuarta (21/01).

Maibé, Arlindo hatete, Ministra uza nia poder hodi orientaauditoria Ministériu nian halo investigasaun ba administrasaun INSS no FRSS, maske Ministra nia dezisaun ne’e kontra Lei no Dekretu Lei INSS no FRSS.

Aleinde ne’e, nia hatutan, kada tinan INSS no FRSS hetan fiskalizasaun abstrata husi Tribunal Kontas no la notifika katak INSS no FRSS halo erru ka irregularidade ruma.

Tanba ne’e, Arlindo defende regra ne’ebé iha, maibé Ministra lakohi simu nune’e hahú halo difamasaun hasoru nia.

Ministra hahú halo intervensaun ba ezekusaun administrativa iha INSS no FRSS, maibé Arlindo mós firme katak INSS no FRRS labele integra ba MSSI ninia administrasaun.

Kona-ba hasa’e salariu, Arlindo dehan, atu hasa’e pesoal ida nia salariu bazeia ba kontratu pesoal sira nian tuir regras no estatutu INSS no FRRS.

“Ministra Veronika bosok.Hein ha’u-nia publikasaun dokumntus sira tuir mai,” nia dehan.

Kontratu termos certo, Arlindo esplika, tuir estatutu, pesoal traballu sira iha INSS no FRSS hotu-hotu ho kontratu termos certo bazeia ba sira-nia abiliade no rezultadu servisu

“Uza salariu termo certo la implika ba planu orsamental kada tinan.Maibé tanba Ministra laran moras ba pesoal sira ne’ebé servisu iha gabinete no mós ba ha’u-nia desizaun, tan ne’e Ministra uza nia maneira oioin hodi hato’o ezonerasaun ba Konsellu Ministru,” dehan Arlindo.