Antonio do Rosario, xefe familia ida ne’ebé hela iha aldeia Metin, Suku Lahane Oriental, Postu Administrativu Na’i Feto, Munisipiu Dili, lakon mós ninia hela fatin.

Hafoin hein durante tinan ida fulan tolu, ikus mai, Antonio ho nia familia hela hikas iha uma.

Iha 4 Jullu, Oxfam ne’ebé harii uma ba Antonio ho apoiu orsamentu husi governu Nova Zelandia, ofisialmente entrega uma ho medida 9x7 metru ne’e, ho kuartu rua, sala ida no dapur ida.

Uma ne’e konstrui husi Oxfam ho durasaun fulan tolu ho apoiu orsamentu husi governu Nova Zelandia ho montante rihun $7.

Director Country Oxfam iha Timor-Leste, Fausto Belo Ximenes hatete, iha tinan kotuk bainhira akontese inundasaun, Antonio nian uma aat hotu, ho ida ne’e Oxfam servisu hamutuk ho komunidade iha ne’e hodi halo reabilitasaun ba nia uma, no ohin loron entrega ona uma ba nain.

“Uma ne’e Oxfam servisu hamutuk ho komunidade sira iha ne’e hodi reabilita, depois de tinan kotuk inudansaun uma ne’e destruidu tomak, maibé ohin loron ita konsege kompleta uma ne’e hodi entrega ba iha uma-nain,” dehan Fausto.

Ida ne’e, nia hatete, nu’udar parte ida husi Oxfam ninia servisu iha Timor-Leate atu suporta komunidade hodi sira bele rezilente liu no mós atu harii fila-fali uma ho asesu ne’ebé di’ak liu ba ema difesensia sira no sira ne'ebé hetan problema.

Iha fatin hanesan, Embaixadór Nova Zelandia iha Timor-Leste, Philip Hewitt hatete, iha tinan kotuk sikulu seroja estraga ema barak nia moris iha Timor-Leste no Timor-Leste hatudu nia forsa no rezilensia boot hodi rekupera husi inundasaun refere.

Maibé, nia hatutan, presiza rekoñese katak susar tebes atu hadia situasaun ne’e no seidauk kompletu ba familia barak.

“Ami hakarak atu hadia di’ak liu mais presiza tempu no aprende husi buat ne’ebe liu. Tanba ne’e ita hakarak atu prepara di’ak liu ba eventu sira iha futuru bele responde lalais di’ak liu tan bainhira mosu sekulu seroja, atu nune’e projetu ne’e bele di'ak ba ita-nia familia sira, ita hakarak uma ne’e ita-nia familia hotu sira sente seguru,” katak nia.

Antonio nu’udar benefisariu hatete, iha tinan kotuk nia uma bee sobu, maibé agradese ba Maromak no ba governu Nova Zelandia no governu Timor-Leste ne’ebe servisu hamutuk hodi bele oferse uma ba nia.

Tuir nia, uma ne’e naton ona ba nia ho kaben no oan na'in tolu hodi hamahan aan.

Maske hetan ona apoiu, maibé nia mós sente triste tanba iha vitima lubuk ida mak to’o ohin seidauk hetan apoiu.

“Ami balun hetan ona maibé balun seidauk, espera katak maluk balun ne’ebe seidauk hetan iha tempu tuir mai bele hetan hotu,” dehan nia.

Entretantu, Prezidente Autoridade Seguransa Protesaun Sivil, Ismael da Costa Babo hatete, uma ida ne’e hanesan sinal amizade entre povu Timor-Leste ho Nova Zelandia.

“Lori governu nia naran hato’o obrigadu ba Embaixadór no Governu Nova Zelandia  ne’ebe mak fó tulun ona ba governu Timor. Nune’e mós agradese ba Oxfam, ho ita-boot sira-nia supervizaun lideransa koopersaun hodi bele realiza ita-nia uma ida ne’e par fó kaman ba ita-nia difesente sira,” dehan nia.

Tuir dadus husi Sekretariu Estadu Protesaun Sivil (SEPS) inundasaun ne’ebe akontese iha 4 Abril 2021, uma-kain 1.031 mak sai vitma, na’in 40 resin lakon vida no na’in 10 resin to’o ohin seidauk hetan nia mate isin.