FONGTIL preokupa kona-ba lei saláriu minimu, tanba lakoi sai fali hanesan ajenda polítika. Maibé, tenke hanoin oinsá bele ajuda servisu na'in sira hodi asesu saláriu ne'ebé bele responde sira nia nesésidade.

Nia haktuir, ida ne'e la'ós ona sai hanesan polítika ida ne'ebé ema hotu-hotu tenke obidese, maibé espera katak molok sira nia mandatu remata bele halo aprovasaun ka la'e.

"Ha’u hanoin iha asuntu importante barak ne'ebé governu bele halo molok sira nia mandatu remata, espera sira bele la'o mais governu tenke hatudu nia vontade hodi aprova lei saláriu mínimu molok mudansa governasaun. Tanba ita nia traballadór sira iha komesa ejize sira nia direitu hanesan professor sira, tanba situasaun balun ne'ebé obriga, ita iha taxa aplikasaun ne'ebé kontinua hatodan ita nia kapasidade kompras nian," dehan Velentin da Silva Pinto ba jornalista jornál INDEPENDENTE iha nia kna'ar fatin Kaikoli, (27/02).

FONGTIL espera hela fulan rua ho balun nia laran molok governu ida ne'e nia mandatu remata, sira bele ajenda ona lei saláriu mínimu.

"Ami nia esperansa katak hela fulan rua ho balun molok sira nia mandatu remata ne'e sira bele ajenda no halo aprovasaun ba lei saláriu mínimu, molok sira nia mandatu remata, tanba ita lakohi lei saláriu mínimu ne'e sai ajenda polítika ne'ebé dada malu afeita nafatin ba esperansa traballadór sira ninian komitmentu polítika governu ninian," tenik nia.

Molok ne'e, iha loron 22 Fevereiru 2023 Ministru Koordenadór Asuntu Ekonómiku (MKAE), Joaquim Amaral hateten, Konsellu Ministru sei aprova proposta lei saláriu mínimu iha mandatu ikus VIII Governu.