Desizaun ne'e Governu foti hafoin halo análize ba aprezentasaun husi koordenadór Sala Situasaun Sentru Integradu Jestaun Krize (SIJK) nian, kona-ba pontu situasaun epidemiolójika iha pais.
“Ohin Konsellu Ministru desidi atu propoin ba Prezidente Repúblika atu renova Estadu Emergensia ba loron 30 tan, hahú husi tuku 00:00, loron 30 fulan-Outubru to’o tuku 23:59, loron 28 fulan-Novembru tinan 2021,”dehan Ministru Prezidénsial Konsellu Ministru Fidelis Leite Magalhães iha Palasiu Governu, kuarta ne’e (20/10).
Tanba ne'e, Prezidente Repúblika sei konvoka reuniaun ho orgaun Konsellu Estadu no Konsellu Seguransa sira, hafoin haruka pedidu ba Parlamentu Nasional hodi halo diskusaun.
Nune'e, ho hanoin ida katak kauza determinante sira ne’ebé justipika ona deklarasaun estadu emerjensia ho nia renovasaun sira kontinua mantein hodi bele evita no neutraliza risku propagasaun, sira husi variante foun SARS- COV-2.
Entretantu, molok ne’e Prezidente Repúblika dekreta EE ba dala-18 hahu iha tuku 00-00 loron 30 Fulan-Setembru no sei termina iha tuku 23:59 loron 29 Fulan- Outobru tinan 2021.
Asistente Editor: Saturnina da Costa
