Ministru Juventude Desportu Arte no Kultura, Nelyo Isaac Sarmento hatete, molok ne'e nia parte aprezenta ona Dekretu-Lei kona ba atu fó subsiduu ba ema hotu ne'ebé envolve iha preparasaun ba realizasaun jogus desportivas CPLP, tanba Timor-Leste maka sai uma nain iha jogu refere.
“Semana kotuk liu ba ha’u aprezenta Dekretu-Lei ida kona-bá atu fo subsidiu ba ema hotu-hotu ne'ebé envolve iha preparasaun no realizasaun jogo CPLP, ita boot sira hatene katak ida ne’e festa ida ne’ebé ita sai uma na'in ba jogos desportivas CPLP nian iha envolvimentu Timoroan sira ne'ebé fó susesu,”dehan Ministru ba Jornalista sira iha Palasiu Governu, Kuarta (16/07).
Governante ne’e dehan, subsidiu ne'e sei fó hahú husi atleta, treinador, asistensia, ofisiais, voluntariu, arbitu no funsionáriu sira ne'ebé iha leve ki'ik, ne'ebé kontribui servisu loron-kalan ba realizasaun no fó susesu ba jogu desportiva CPLP.
Nune’e, sira iha remuneratóriu ka subsidiu ida ne'ebé la hanesan ho sira nia salariu maibé subsidiu ida ne'ebé maka governu sente katak merese sira hetan durante fulan hira ba preparasaun to'o realizasaun jogu CPLP. .
"Entaun ohin Governu liuhusi Konsellu Ministru apoiu ba dekretu lei ida-ne'e, entaun fó oportunidade legalmente ba Ministru, atu selu subsidiu ba sira," katak Ministru Nelyo.
Ministri Nelyo Isaac hatutan, MJDAK prevee rihun $170, uza hanesan subsidiu no subsidu ne’e rasik sei selu kada ema la hanesan, no tuir durasaun servisu ne'ebé iha.
Entretantu, Konsellu Ministru mós iha kuarta ne’e (16/07) aprova ona projetu Dekretu-Lei, ne’ebé aprezenta husi Ministru Juventude, Desportu, Arte no Kultura, Nelyo Isaac Sarmento, kona-ba subsídiu disponibilidade no dedikasaun nian iha ámbitu Jogu Desportivu CPLP ba da-12 tinan 2025 iha Timor-Leste.
Diploma ne'e ho objetivu atu rekoñese esforsu no garante disponibilidade totál hosi elementu sira ne'ebé envolve iha organizasaun no partisipasaun Timor-Leste nian iha Jogu Desportivu CPLP ba da- 12, ne'ebé sei hala'o hosi loron 17 to’o 27 fulan-jullu tinan 2025.
Iha sentidu ida-ne’e, estabelese subsídiu disponibilidade no dedikasaun ba voluntárius, atletas, treinadores, árbitrus, ofisiais, animadores, funsionárius kontratadus no funsionárius públikus hosi Ministériu Juventude, Desportu, Arte no Kultura, ne’ebé partisipa diretamente iha preparasaun no ezekusaun eventu nian.
Subsídiu ida-ne'e, ho karater finanseiru no ne’ebé fó hanesan exesaun, ho objetivu atu kompensa kondisaun serbisu espesiál sira ne'ebé ezije, liuliu oras estraordináriu ne'ebé liu oras tolu loroloron, iha períodu entre loron 17 fulan-maiu no loron 27 fulan-jullu tinan 2025. Lista benefisiáriu sira sei aprova liuhosi despaxu ministeriál, bazeia ba informasaun sira ne’ebé hato’o hosi Sekretariadu Komisaun Organizadora Lokál Jogu Desportivu CPLP nian.
