Ministru Prezidénsia Konsellu Ministru, Fidelis Leite Magalhães haktuir, desizaun ne’e foti hafoin konsellu ministru análiza situasaun atuál iha Kovalima hahú normal, maibé regra sira kona-ba saúde públiku nian kontinua eziste.
“Ita loke ona movimentu ba munisípiu sira. Sira bele halo ona atividade hanesan baibain, sira ne’ebé ba eskola bele, servisu no atividade seluk,”dehan Fidelis hafoin desizaun konsellu ministru, iha salaun Ministériu Finansa.
Maski hapara ona serka sanitária iha Covalima, maibé sei kontinua taka total movimentu iha munisípiu Bobonaro no Covalima relasiona ho ema tama sai ilegal husi fronteira.
Entretantu semana kotuk Governu mós hapara uluk serka sanitária iha Bobonaro, tanba situasaun covid-19 rekopera ona.
Tuir dadus Covid-19, tersa horsehik pasiente sira ne’ebé agora iha fatin izolamentu Vera Kruz hamutuk 48.
Sala Situasaun Sentru Integradu Jestaun Krize (SIJK) kontinua husu ba populasaun iha Dili laran tomak atu nafatin kalma, lalika pániku, hela deit iha uma wainhira laiha nesesidade atu halo movimentu bá-mai, pratíka nafatin medida sira ne’ebé ita hotu hatene ona:
- a) Uza máskara
- b) Fase liman bebeik ho sabaun ka dezinfetante ruma
- c) Wainhira kumprimenta malu, lapresiza kaer-liman, bensa-liman, rei-malu ka haku’ak malu
- d) Evita halibur malu barak
- e) Hamri’ik ka tur dook husi ema seluk, mínimu metru ida ho balu
