Vise-Ministru Interior Antonio Armindo hatete, Governu deside taka fronteira terestre entre Timor-Leste no Indonézia hodi evita variante Delta tama iha TL.

“Oras ne’e ita hotu nia prekupasaun makas ba ita nia sidadaun sira ne’ebé intensaun kontinua halo pasajen illegal, entaun estratejia Governu nian ne’e mak taka fronteira terestre, tanba ita hotu hatene katak moras ne’e importadu husi Indonezía mak tama mai ita nia rain,”dehan nia ba jornalista sira hafoin remata debate estensaun EE dala-16, iha Parlamentu Nasionál, tersa (27/07).

Nia dehan, iha semana kotuk nia parte hamutuk ho Ministru Defeza ba fronteira hodi husu sidadaun hotu atu kontribui ho autoridade sira hodi bele tau-matan ba sidadaun sira ne’ebé halo pasajen illegal.

Entretantu, relasiona ho variante Delta ne’ebé iha nasaun viziñu kada loron aumenta, Ministériu Saúde (MS) no Sentru Integradu ba Jestaun Krize (SIJK) deskuti hela posibilidade balun atu taka fronteira.

Ministra Saúde, Odete Maria Freitas hatete, posibilidade Timor-Leste sei iha médidas ne’ebé rigorozu liu tan hodi bele kombate variante Delta.

Tanba ne’e, nia parte koalia ona ho SIJK no parte seguransa atu bele halo kontrolu maximu iha frontreira Timor-Leste no Indonézia.

Enkuantu, Reprezentante Bankada CNRT, Deputada Maria Terezinha Viegas husu VIII Governu Konstitusional tenki taka fronteira ho sériu, nune’e evita variante Delta tama mai iha Timor-Leste.

Asistente Editor: Saturnina da Costa