Ministru Prezidensial Konsellu Ministru, Fidelis Leite Magalhães hateten, objetivu ne'e atu organiza diak liu tan, funsionamentu unidade F-FDTL sira nian.
Nia dehan, iha estatutu orgánika ne'e, atu refleta mós katak, iha F-FDTL nia laran iha mós unidade espesial sira, atu nune'e bele koloka sira iha kuadru legal ne'ebe iha.
"Atu refleta hodi estabelese ninia estrutura no atribuisaun. Unidade Falintil ne’e, integra ona iha estrutura sentrál FALINTIL-Forsas Defeza Timor-Leste, hanesan Unidade Operasaun Espesiál ida," dehan nia iha Palasiu Governu, kuarta ne'e ( 13/07).
Govenante ne'e hatuatn, ninia misaun prinsipál mak atu forma militár sira iha área espesífika operasaun espesiál nian no hodi prepara Forsa Operasaun Espesiál ida.
Enkuantu, Forsa Operasaun Espesiál ida mak, unidade operasionál efetivu reduzidu ida, espesialmente organiza no harii pesoál espesialmente selesionadu, treinadu no ekipadu hodi hala’o sob-kondisaun fízika no psikolojikamente eziste iha kumprimentu misaun nian, ne’ebé ezije téknika no atuasaun ne’ebé la konvensionál.
Entretantu, Konsellu Ministrus mós aprova projetu Dekretu-Lei ne’ebé halo alterasaun Orgánika Polísia Nasionál Timor-Leste (PNTL) nian. Projetu husi Dekretu-Lei ida-ne’e sai ona hanesan objetu deliberasaun iha Konsellu Ministrus nian iha loron 25 fulan-maiu tinan 2022, maibé iha alterasaun balun iha faze redasaun finál nian, presiza submete ba deliberasaun foun.
