Ministra Edukasaun Dulce de Jesus Soares hatete, Ministeriu Edukasaun nafatin tau importánsia ba manorin sira no Ministeriu Edukasaun mós halo ona rekrutamentu ba manorin foun sira, ba nivel eskola hahú husi ensinu pre-eskolar to'o ensinu sekundáriu.

"Iha tempu badak iha fulan Agusto no Setembro nia laran ita sei koloka tan manorin 700 resin ba eskola nivel sekundario relan no tekniku Vokasional sira," dehan Ministra iha Edifisiu MF Aitarak-laran, Tersa (05/08).

Ministra Edukasaun hatutan, iha tinan 2026 manorin sira iha Ministériu Edukasaun hamutuk rihun ida resin sei reforma, tanba idade tama ona ba reformadu.

Tanba ne'e, rekrutamentu sei kontinua la'o nafatin hodi prense vaga sira ne'ebé sei mamuk iha eskola sira, no tempu badak ME sei servisu hamutuk ho Komisaun Funsaun Públika (KFP) no Institutu Nasional Seguransa Sosial (INSS) hodi halo mudansa ba manorin sira ne'ebé durante ne'e sofre moras prolongada no  balun ne'ebé mate ona.

"Tanba ne'e prosesu la'o kontinua bazeia bá kuadru pesoal husi Ministériu Edukasaun deside hodi hare tuir nesesidade eskolas,”hakotu nia.