Xefe Gabinete Kontrolu Kualidade no Komunikasaun HNGV, Sara Xavier informa, iha fulan Agustu HNGV liu husi sala maternidade rejista bebé na’in 491 mak moris, maibé na’in 12 mak mate.

“Iha fulan Agostu ne’e total inan sira ne’ebé mak baixa iha sala maternidade ne’e hamutuk 529, husi total ne’e inan sira ne’ebé mak partu hamutuk 483, husi ne’e bebé na’in 491 mak moris no na’in 4 mak kaduak no na’in 12 mate,” dehan Sara iha HNGV, Bidau, Kinta (03/09).

Nia hatutan katak, inan 483 ne’ebé partus, nain 346 partus normal, na’in 108 partu sejariana, na’in 29 partu instrumental, no partu bebé nia pozisaun kidan uluk na’in 18.

Kona-ba kazu mate, nia dehan, iha inan 1 no bebé na’in 12 mak mate, kompostu husi bebé mate iha inan nia kabun laran hamutuk na’in 6 no bebé ne’ebé moris mai hafoin mate hamutuk na’in 6.

Nia esplika katak, bebé sira ne’ebé mate iha inan nia kabun laran kauza husi komplikasaun hypertensaun durante gravidéz, no mós hetan infesaun.

Tanba ne’e, atu redúz bebé sira ne’ebé mate iha inan-nia kabun laran, durante gravidéz inan sira presiza halo konsulta regular atu nune’e parteira sira bele monitór kondisaun atu iha komplikasaun bele deteta sedu hodi halo tratamentu, atu nune’e labele fó impaktu ba bebé mate iha kabun laran no inan mós presiza konsumu ai-han ne’ebé nutritivu tanba bebe presiza nutrisaun ne’ebé adekuadu atu bele dezenvolve di’ak no saudavél.

Entretantu, hahú husi fulan Janeiru to’o Agostu, inan ne’ebé partus iha HNGV hamutuk 3.843 no bebé na’in 3.878 mak moris kompostu husi kaduak na’in 83 no mate na’in 66.