"Surtu Covid-19 ne'e, ita husu atu konsentrasaun nakonu ba kombate surtu Covid-19, maibé la signifika katak politika sira labele halo, sira bele halo más oinsa mak tau sasan ketak ketak, nune'e mós iha politika sira bele halo debate no ko’alia maibé kuandu ita tau atensaun ba Covid-19 sira labele politiza,"Diretór FONGTIL, Daniel dos Santos kestiona kona-ba Governu hahú la foku ona ba Covid-19 maibé lori pandemia ne’e ba kestaun politika.
Diretor ne’e akresenta, labele hanoin dehan ne'e partidu A no ida ne'e partidu B nian ne'e ladun di’ak, tanba Covid-19 ne'e pandemia Global ne'ebé nia efeitu kazu barak.
Nia hatutan tan, lideransa nasional sira, partidu politiku sira tenke apoiu Governu ba kombate Covid-19, maibé politika sira bele kontinua nafatin ko’alia tanba moris iha nasaun ida tenke ko’alia maibé atu di’ak liu agora fokus uluk ba Covid-19.
"Ita nia kapasidade mós problema fó resposta ba atendimentu Covid-19 nian. Maibé ita tenke rekoñese saida mak estadu deside halo maske iha fallansu maíbe ita susesu iha lubuk ida purezemplu hanesan ita iha kuarentina, Sentru Izolamentu, laboratorium no mós Governu halo politika ba pakote subsidiu ekonomia ba nia povo ne'e,”dehan nia.
Tuir nia katak, labele nega ba susesu balun ne’ebé Governu halo, maski buat barak ladun lao diak hanesan povu balun kestiona kona-ba nia problema ba nesesidade no lakon sira nia serbisu durante Estadu Emerjénsia.
