"Rede ba saúde ne’e estabelese atu eleva sosiedade sivil sira nia involvimentu ho governu hodi asegura servisu saúde ne'ebé inkluzivu, justu no kualidade ba timor-oan," dehan Diretóra Interina FONGTIL, Elizabeth Lino Araujo, ba jornalista sira iha Suai Room, Timor Plaza, kinta ne’e (05/05).
Nia hatutan, Rede ba Saúde Timor-Leste (REBAS-TL) nu'udar rede ida, husi Sosiedade Sivíl ne'ebé servisu iha setor saúde hodi halibur hamutuk advoka ba politika bazeia ba dadus ho ema sira ne'ebé halo desizaun no hadi'a partisipasaun síviku hodi hametin sistema saúde.
Iha fatin hanesan, Enkaregadu Negósiu Embaixada Estadus Unidos Amerika-USAID Timor-leste, Tom Daley hateten, lansamentu programa Rede ba Saúde ne'e, iha timor-leste ho objetivu atu garante ema hotu-hotu bele asesu kualidade Saude diak no efetivu.
Tanba ne'e, Enkaregado hatutan, Estadus Unidos Amerika sei kontinua atu hamrik hamutuk ho Timor-leste nu'udar belun no parseiru hodi servisu hamutuk atu haforsa seguransa Saúde no hadi’a komunidade nia ben-star iha teritoriu tomak.
Enkuantu, ba lansamentu ne'e hetan apoiu husi Estadus Unidus Amerika liu husi UN misaun ajensia ba Dezenvolvimentu Nasional (USAID) hanesan parte ida husi apoiu finanseiru miliaun $15.6 ne'ebé fornese liu husi USAID nia aktividade ba sustentabilidade sistema saúde.
Entretantu, Vise-Ministeriu Saúde, Bonifácio Mau Coli dos Reis, hatete, ho estabelesimentu Rede ba Saúde husi FONGTIL, ne'ebé hetan fundus finansiansiamentu husi USAID Timor-Leste, hodi sai nu'udar parseiru estratejiku ida ne'ebé esensiál tebes atu bele apoia servisu Ministériu Saúde liuhusi kooperasaun, kordenasaun, kolaborasaun mutual.
Governante ne’e akresenta, bazeia ba kompromisu husi VIII Governu Konstitusionál, ba objetivu jerál mak, atu asegura kobertura universál saúde ho kualidade, kuidadu saúde primáriu no promove utilizasaun adekuada, kuidadu ospitalár ne'ebé koloka individu iha sentru atensaun.
Ho nia misaun mak atu hadi’a asesu ba servisu saúde, haforsa no hasa'e kualidade servisu saúde, reforsa kualidade no dezenvolve rekursu umanu ba saúde, haburas partisipasaun komunitaria iha saúde no mós fortalese sistema jestaun servisu nasionál saúde.
“Atu mantein no hadi'a prestasaun servisu saúde ba populasaun tomak hodi ita hotu hakbesik an ba realizasaun vizaun "Timorenses saudáveis num Timor-Leste saudável", liuhusi garante asesu no kobertura diak ba populasaun tomak, haktuir mós ba metas sira ne'ebé define ona iha Planu Estratejiku Dezenvolvimentu Nasionál no Planu Estratéjiku Nasionál Setor Saúde,” tenik nia.
Iha oportunidade ne'e Vise-Ministru mós apresia ba Ministériu relevante sira seluk, Ajensia Nasoens Unidas, Parseiru Dezenvolvimentu, Instituisaun ba Krensa Relijioza ida idak, nstituisaun Akadémika, NGO Internasional no Nasionál no Privadu, Sosiedade Sivil, Líder KomunidadebSira hotu ne'ebé sempre hamutuk no apoiu Ministériu da Saúde hodi hadi'a assistensia Saúde
Ne’ebé asesivel ba populasaun hotu no ikus mai rezulta ba dezempeñu Setor Saúde iha Timor-Leste.
Ho parseria mak Ministériu Saúde iha forsa no apoiu hodi hala'o knar diak liu tan.
