Tuir dadus ne’ebé ekipa Online INDEPENDENTE asesu husi Portal eProcurement Timor-Leste, https://www.eprocurement.gov.tl, to’o iha Domingu (04/10) horseik, rejista atividade kompaña Evip Marel Unipesoal Lda. dala ida de’it.
Iha portal ne’e informa katak Evip Marel, Unipesoal Lda. hala’o atividade Fornesimentu servisu Limpeza no Lavandaria iha servisu Centrais Ministerio da Saude, Timor Leste; ID: 1370634; Numeru Referensia/PO: RDTL-MS-UAC-K-24-089; Tipu Dokumentu Aprovizonament: Concorso/Tender; Data Publikadu: 31-05-2024; Prazu simu proposta: 05-06-2024; Status: CLOSED_AWARDED; Data ba Premiu (selu): 06-06-2024.
Dadus ne’e hatudu, transferensia orsamentu ba kompaña ne’e hamutuk $125,264.
Bainhira kompara orsamentu ne’e ho kontratu númeru RDTL-MS-UAC-K-24, ne’ebé asina entre Ministra Saude, Elia, ho Diretór Kompaña Evip Marel, Unipesoal Lda., Bruno Samuel Soares, orsamentu ba projetu ne’ebé hahú implementa iha 01 Maiu 2024 to’o 30 Abril 2025 ne’e ho total $187,196, ne’ebé sei selu dala rua. Etapa dahuluk selu ho $125,264 ho Orsamentu Jeral Estadu (OJE) 2024, no etapa daruak $62,632 ho OJE 2025.
Maibé, bazeia ba dadus ne’ebé iha hatudu katak transferensia orsamentu ba projetu ne’e halo dala ida de’it, ho montante orsamentu ne’ebé diferente ho kontratu.
Ba kompaña Evip Marel II, Lda., Portal eProcurement ne’ebé eziste dezde 2010 ne’e rejista atividade lima (5). Atividade hirak ne’e ba hotu de’it Fornesimentu Servisu Limpeza no Lavandaria, Ministériu Saude (MS) nian.
Atividade dahuluk ne’ebé rejistu mak Fornesimentu Limpeza no Lavandaria iha Edificio Centrais, Ministerio Saude, Timor Leste; ID: 1600303; Numeru Referensia/PO: RDTL-MS-UAC-KP-25-030A; Tipu Dokumentu Aprovizonament: Concorso/Tender; Data Publikadu: 15-09-2025; Prazu simu proposta: 20-09-2025; Status: CLOSED_AWARDED; Data ba Premiu: 28-09-2025.
Orsamentu ba projetu ne’e hamutuk $171,000.
Atividade daruak mak Fornsimentu Limpeza no Lavandaria iha HoREX Baucau, Ministerio Saude: ID: 1591797; Numeru Referensia/PO: RDTL-MS-UAC-KP-25-029A; Tipu Dokumentu Aprovizonament: Concorso/Tender; Data Publikadu: 27-08-2025; Prazu simu proposta: 01-09-2025; Status: CLOSED_AWARDED; Data ba Premiu: 28-09-2025.
Dadus ne’e hatudu, orsamentu ba projetu ne’e hamutuk $110,947.50.
Atividade datoluk mak Fornesimentu Limpeza no Lavandaria iha Hospital Referral Maubisse, Ministerio Saude, Timor Leste; ID: 1600281; Numeru Referensia/PO: RDTL-MS-UAC-KP-25-039A; Tipu Dokumentu Aprovizonament: Concorso/Tender; Data Publikadu: 15-09-2025; Prazu simu proposta: 20-09-2025; Status: CLOSED_AWARDED; Data ba Premiu: 29-09-2025.
Orsamentu ba projetu ne’e hamutuk $36,311.25.
Atividade dahaat mak Fornesimentu servisu Limpeza no Lavandaria iha servisu Centrais, Ministerio Saude, Timor Leste; ID: 1606042; Numeru Referensia/PO: RDTL-MS-UAC-KP-25-030A; Tipu Dokumentu Aprovizonament: Concorso/Tender; Data Publikadu: 27-09-2025; Prazu simu proposta: 02-10-2025; Status: CLOSED_AWARDED; Data ba Premiu: 29-09-2025.
Orsamentu ne’ebé kompaña hetan ba projetu hamutuk $171,000.
Atividade dalima mak Fornesimentu Limpeza no Lavandaria iha HoREX Baukau, Ministériu Saude, Timor-Leste; ID: 1606069; Numeru Referensia/PO: RDTL-MS-UAC-KP-25-029A; Tipu Dokumentu Aprovizonament: Concorso/Tender; Data Publikadu: 27-09-2025; Prazu simu proposta: 02-10-2025; Status: CLOSED_AWARDED; Data ba Premiu: 29-09-2025.
Dadus ne’e hatudu, orsamentu projetu ba kompaña ne’e hamutuk $110,947.50.
Osan projetu limpeza ba Evip Marel II $600 resin
Bazeia ba dadus husi Portal eProcurement Timor-Leste, orsamentu ba projetu limpeza ba kompaña Evip Marel II, Lda. hamutuk $600,206.25.
Portal ne’e rejista projetu ba Fornesimentu servisu Limpeza no Lavandaria iha servisu Centrais, Ministerio Saude, Timor Leste, dala rua, iha 28 Setembru no 29 Setembru 2025, ho montante orsamentu ne’ebé hanesan, $171,000. Ho nune’e total osan ba projetu ne’e hamutuk $342,000.
Enkuantu bazeia ba kontratu ho númeru: RDTL-MS-UAC-KP-25-030A, ne’ebé Ministra Elia asina ho Diretór Kompaña Evip Marel II, Lda., José Antonio Pape Granadeiro, iha 19 Agostu 2025, total orsamentu ba projetu ne’e $410,400, ne’ebé sei selu dala rua. Etapa dahuluk selu ho $171,000 ho OJE 2025, no etapa daruak selu ho $239,400 husi OJE 2026.
Ba projetu Fronesimentu Limpeza no Lavandaria iha HoREX Baukau mós hanesan, rejista iha 28 no 29 Setembru 2025, ho montante orsamentu ne’ebé mós hanesan, $110,947.50. Ho nune’e total osan ba projetu limpeza iha HoREX Baukau hamutuk $221,895.
Evip Marel rejista iha SERVE
Tuir dadus husi Servisu Rejistu no Verifikasaun Emprezarial, Institutu Públiku (SERVE,IP), Evip Marel, Unipesoal Lda. no Evip Marel II, Lda. rejistradu iha SERVE ho tipu atividade Kontrusaun Uma, Estrada, Hatama sasan elektroniku, no atividade limpeza.
“Tuir ita-nia lei sosiedade komersiál númeru 10/2017 no ita-nia Dekretu Lei 16/2017 ne'ebé mak ko'alia kona-ba rejistu komersiál, iha artigu 4, ko'alia klaru hela katak kompañia rua refere hetan ona ninia personalidade juridikamente hodi hala'o nia atividade,” informa Supervizor Senior SERVE,IP, Raul Sanches Lajes, ba Jornalista INDEPENDENTE, Sesta (03/10).
Kompaña Evip Marel, Unipesoal Lda. nia asionista mak Bruno Samuel Efidio Soares, no Evip Marel II, Lda. nafatin Bruno ho nia parseiru José Antonio Pape Gramadeira.
“Tuir ita-nia lei rejistu komersiál, sira na’in rua ne'e mak sai asonista ba kompaña refere,” dehan nia.
Kompañia Evip Marel, Unipesoal Lda. rejistu iha 30 Novembru 2023, no iha 2024 Bruno hamutuk fali ho José loke tan kompaña ida ho naran hanesan maibé ho tipu Lda. ne'ebé mak estabelese iha 27 Novembru 2024.
“Sira-nia atividade prinsipál mak hanesan konstrusaun ba edifisiu ou não edifisiu, konstrusaun ba estrada, konstrusaun ba liña torre sira, no atividade hanesan limpeza jerál i pengadaan ba ekipamentus elektróniku,” nia afirma.
Tuir fonte konfirmadu ida, kompaña rua ne’e nia na’in loloos mak Ministra Saude, Elia A. A. dos Reis Amaral.
“Nia harii kompaña ne’e par atu kaer de’it projetu limpeza iha Ministériu Saude,” dehan fonte ne’ebé lakohi públika ninia identidade ne’e.
Tuir fonte ne’e, iha tinan 2024, Evip Marel, Unipesoal Lda. kaer projetu limpeza iha edifisiu sentral MS nian no HoREX Baukau. Enkuantu iha tinan 2025, Evip Marel II, Lda. kaer projetu limpeza iha edifisiu sentral MS, HoREX Baukau, no Hospital Referal Maubisse.
“Sira tuir duni konkursu mais ne’e formalitas de’it,” dehan fonte ne’e.
Vise PM sei husu Ministra Elia
Vise Primeiru Ministru Asuntu Sosiál no Ministru Dezenvolvimentu Rurál no Abitasaun Komunitaria, Mariano Assanami Sabino hatete, projetu limpeza ne’ebé deskonfia mosu iregularidade nu’udar responsabilidade Ministériu Saude nian.
"Sim, ne'e iha internal ne'ebá, iha Inspetor, iha Auditor, iha mós Auditor Internal ne'ebá, ne'ebé sasán sira ne'ebé ladún loos sira haree. Ha'u nu'udár Ministru Kordenador labele mai fali ko'alia,” dehan Vise PM ne’e iha salaun Komisaun Nasionál Eleisaun, Sesta (03/10).
Kona-ba folin sasan iha projetu ne’e, tuir nia, dala-ruma kompaña sira mak tau hanesan ne'e.
"Item ne'ebé nia sosa ne'e nia osan iha ne'ebá ona, hanusa mak osan ne'e bele hasa'e tiha fali. Tanba ida ne'e mak teknikamente ha'u la'ós Ministru ida ne'ebé atende ida ne'e, entaun ha'u halo koordenasaun katak ita halo buat hotu-hotu par ita bele efetivu liu, efisiente liu, iha servisu efikasia, ita bele kontrolu di'ak i servisu di'ak. Ne'e responsabilidade Ministériu Saúde atu haree," dehan nia.
Nu’udar Ministru Koordenadór, nia dehan, sempre iha enkontru regular. Tan ne’e, nia sei aproveita enkontru regular ne’e hodi husu kona-ba problema ne'e.
"Nu'udar Ministru koordenadór ami baibain enkontru regular, ne'e ami sei husu ida ne'e, issu saida mak iha, ida ne'e problema saida ou problema ida ne'e rezolve ona ka seidauk, ida-ne'e baibain iha enkontru kordenasaun ami sempre ko'alia ida ne'e," dehan nia.
Tuir nia, governu labele foti kedan desizaun ruma bazeia ba issu, maibé presiza halo analiza no tetu buat hotu-hotu, nune’e bainhira desizaun ne’e sai bele forte no loos.
"Ita Timor ne'ebé labele issu hanesan ne'e ita foti desizaun, ho issu hanesan ne'e tenke analiza no tetu buat hotu-hotu i depois mak halo desizaun, desizaun ne'e forte, firme, la'o loos, ne'ebé tenke haree buat hotu-hotu,” katak nia.
MS no kompaña sei ‘taka ibun’
Hahú husi 29 Setembru to’o 03 Outubru ne’e, Jornalista INDEPENDENTE koko nafatin halo konfirmasaun ho parte Ministériu Saude (MS) no parte kompaña Evip Marel, maibé seidauk hetan rezultadu.
Ofisial Ministériu Saude (MS) nian ida ne’ebé hetan konfirmasaun hatete, nia parte seidauk bele fó informasaun tanba seidauk hetan autorizasaun husi Ministra Elia.
Enkuantu, husi parte kompaña, maske Jornalista INDEPENDENTE haruka ona mensajen liu husi WhatsApp no telefone, maibé parte kompaña hili atu la koalia.
