Akampamentu Tékniku ne'e hala’o ho kolaborasaun hamutuk ho Asosiasaun Jornalista Timor Lorosa'e (AJTL) no Timor-Leste Press Union (TLPU), ne’ebé apoia finansiamentu husi Ministériu Negósiu Estranjeiru EUA nia no mós departamentu ba asuntu edukasional no kulturál.
Programa ida ne’e, hanesan ba dala uluk, kona-ba akampamentu téknika nian ne’ebé hala’o iha Timor-Leste.
Akampamentu téknika ne'e halibur jornalista Timoroan foin sa'e liu 50 iha Dili ba programa ne' e, ne’ebé hala’o iha loron 16,17 no 23 fulan Outubru. Partisipa virtualmente husi Estadus Unidus, Indonézia no Filipina, treinadór jornalista senior nain hat fahe koñesementu no esperiensia no diskuti prátika diak liu hodi hametin jornalizmu investigativu ne’ebé bazeia ba realidade iha Timor-Leste hodi luta kontra dezinformasaun.
“Ami sente haksolok tebes atu organiza Akampamentu Tékniku ida ne'e, iha momentu krítiku ida ne'e. Pandemia Covid-19 lori ona dezafiu kritiku ne'ebé hamosu impaktu dezinformasaun ba sidadaun sira iha ita nia nasaun rua ne 'e kada loron,” hatete Enkaregadu Negósiu Embaixada EUA, Tom Daley.
Jornalista Timoroan sira ne’ebé partisipa iha programa ne'e hetan ‘fini finansiamentu’ hafoin hala'o akampamentu téknika hodi fó apoia liu tanba esforsu lokál nian atu hametin atividade verifikasaun faktu.
“Sosiedade demokrátiku sira harii bazeia ba direitu no liberdade espresaun. Maske nune’e, liberdade ne’e dala barak utiliza atu kria istória falsu no rumores no mós dala barak ho konsekuensias ne’ebé seriu. Tanba ne'e, importante tebes ba jornalista sira atu bele hatene identifika informasaun ne'ebé laloos iha notisia no mós media sosiál,”tenik nia.
Jornalista senior ne’ebé involve iha akampamentu téknika ne’e mak hanesan Deborah Nelson, Professor ba Jurnalizmu Investigativu husi Universidade Maryland; Aribowo Sasmito, Co-Fundador no Espesialsta Verifika Faktus husi MAFINDO, organizasaun laos lukrutivu ne’ebé harii ba kombate dezinformasaun, Karol Ilagan, Editorial Director husi Philippine Center for Investigative Journalism; no Wahyu Dhyatmika, Editor-in-Chief of Tempo.co.
Akampamentu tékniku mak programa ida ne’ebé organiza husi Ministériu Negósiu Estranjeiru EUA nia Departamentu ba Asuntu Edukasional no Kulturál. Akampamentu tékniku hala’o iha nasaun sira iha mundu tomak atu fasilita ligasaun entre partisipante sira ho espesialista teknolojia sira atu kria solusaun teknolojia inovativa no harii abilidade dijital hodi kria solusaun konkreta ba dezafiu real mundu nian.
Asistente Editor: Saturnina da Costa
