Xefe Departamentu Mekánika produsaun, Raimundo da Costa Guterres hateten, Kadeira sira ne'e mai husi eskola Sekundária Jerál ne'ebé durante MEJD lori mai iha ESTV Bekora ho kondisaun aat hamutuk 200 hodi halo manutensaun ka hadi’a.

"Ami konsege hadi'a no agora daudaun ami entrega fila-fali ba MEJD nafatin ho 200 Kadeira. Husi Kadeira sira ne'ebé mak ami hadi'a ne'e nune'e bele fasilita eskola sira ne'ebé mak to'o agora laiha Kadeira," nia hateten iha ESTV Bekora, Sesta (01/07/2022).

Ministru Edukasaun Juventude no Desportu, Armindo Maia hateten, materiál sira ne'ebé mak ESTV hadi'a ne'e sei distribui ba iha eskola Sekundária Jerál balun iha Dili.

"Atividade ohin iha ESTV Bekora entrega kadeira sira ne'ebé mak ita nia estudante husi mekánika produsaun durante ne'e sira hadi'a, depois servisu hamutuk ita fasilita orsamentu oitoan, no agora daudaun sira konsege hadi'a," nia dehan.

MEJD nafatin halo kooperasaun ho ESTV Bekora no nune'e bele hare'e orsamentu balun atu bele tau ba iha eskola ne’e, nune'e estudante sira bele hadi'a kadeira no meza sira ne'ebé mak aat ona.

Oras ne’e daudaun iha kadeira 20.000 kadeira no meza ne'ebé mak atu distribui ba eskola sira, tanba ne'e MEJD sei tau prioridade ba eskola 200-resin ne'ebé agora daudaun iha prossesu konstrusaun, maibé la taka dalan ba sira ne'ebé mak durante ne'e laiha kadeira no meza.

Kadeira no meza 20.000 ne'ebé MEJD sosa ne'e ho nia orsamentu hamutuk millaun $1.5, mai husi Orsamentu Jerál Estadu 2021.