Tuir observasaun Online INDEPENDENTE nian iha terenu nota katak, iha manifestasaun ne'e estudante sira hato'o sira nia aspirasaun kona-bá politika sosa kareta foun, halakon lei pensaun vitalisia, muda lei manifestasaun no alokasaun orsamentu ho pursentu kiik ba setór produtivu sira iha baze.

Enkuantu, manisfestasaun refere, Estudante Universidade Nasional Timor Lorosa’e (UNTL), hamutuk ho kamada sosiál sira hahú halibur hamutuk iha resintu UNTL Sentral Dili iha tuku 8:00 otl, hodi hein estudante sira seluk hanesan, universidade  Dili (UNDIL), Universidade Oriental Timor Lorosa’e (UNITAL), Intitutu Of Businesses (IOB), Universidade da Paz (UNPAZ) hodi halo asaun pasifiku hasoru Parlamentu Nasional.

Nune’e, hahú tuku sanolu liu minutu balun, estudante sira husi Universidade UNITAL, IOB, UNDIL, UNPAZ hahú tama resintu UNTL hamutuk ho Sosiedade sivil FONGTIL.

Entretantu, Ema ho Defisiesia tama iha resinu UNTL iha tuku 9 liu minutu balun.

Tuir observasaun online ne’e nian mós nota katak, estudante sira hahú ho ulun manas hodi ezize ba Parlamentu nasional atu kansela asuntu haat ne’ebé mensiona.

Tanba ne’e, bainhira sira kontinua hakilar no asaun ne’ebé manas liu tan, Polisia Nasional Timor-Leste mós hahú halo atuasaun, hodi tiru gas lakrimojeniu ka gas air mata ba manifestante sira, maibe manifestante sira kontinua hakilar ho liafuan "Viva", balun kanta no balun monu iha fatin manifestasaun.

Enkuantu, iha manisfestasaun ne’e Polisia Nasional Timor-Leste kontinua halo seguransa masimu  hodi evita mosu konfrotasaun ruma.