Sidadaun estranjeiru na’in lima ne’ebé konfirmadu pozetivu Covid-19 kompostu husi mane 3 no feto 2, entre sidaudan  ne’e mane iha idade 52, 50, 15 no feto iha idade 14 ho 18, mai ho kazu  asintomatiku.

Kordenadóra Jerál Komisaun Covid-19, Odete da Silva Viegas informa, sidadaun na’in lima ne’e halo viajen husi Tánzania iha 17 janeiru 2021 no 20 janeiru tun iha Aeroporto Dili ho aviaun Malázia Airlines.

“ Sira halo auto-kuarentena iha Lorenso Campound Metiaut no fatin refere prenxe duni prosedimentu Covid-19, nune’e teste swab foti iha dia 29 Janeiru, resultadu RT- PCR pozitivu SARS CoV-2 relata iha 1 Fevereiru 2021,” dehan Odete liu husi Konferensia Imprensa, iha Palasaiu da Cinzas, Kaikoli (02/02).

Nia dehan, iha loron 20 Janeiru ne’e pasajeiru sira tun ho aviaun Malázia Airlines hamutuk ema na’in 75 iha aeroportu, enkuantu to’o iha Dili pasajeiru na’in 75 ne’e hela  iha diferensa ótel no apartementu hamutuk 19.

Otel ne’ebé  pasajeiru na’in 75 hela ba mak, Ótel Arbiru Beach, Ótel Timor, Kampaun Beach House, Rezidénsia Malinamok, Villa Mata Rua, JL Vila, Kampaun Menoa, Ótel Time Square, Villa Bemori, Jack Sing Apartementu, Kampaun Timor Resort, Beach Garden, Palm Beach, Rezidénsia Tuana Laran, Ray Garden Apartamentu, Rezidénsia Jacinto, Villa Mar, USA Embassy no Rezidénsia Comoro.

Dadauk ne’e pasiente na’in lima refere, ekipa saúde izola ona ba iha sala izolamentu Vera Cruz, enkuantu atual pasiente pozitivu Covid-19 ne’ebé baixa hamutuk na’in 22, iha Verra Cruz na’in 21 no iha RAEOA na’in 1.

Dadus komulativu teste hamutuk  19.223, hein rezultadu hamutuk  64, kazu foun aumenta 5, komulativu kazu  75, rekuperadu husi Covid-19 na’in 2 no atuál baixa na’in 22 iha Vera Cruz 21, RAEOA 1.

Ida ne’ebé  dadauk ne’e iha kuarentena hamutuk  229 iha Dili na’in 125 no  Munisípiu 104, no total auto-kuarentena  183 iha Dili 176 no iha Munisípiu na’in 7.