Xefe Seksaun Rejistu Kadetes Foun PNTL, Superintendente Polisia Basilio de Jesus hatete, sekretariadu rekrutamnetu hahú rejistu no distribui formulariu ba kadetes foun PNTL tinan 2025 no 2026.
“Ohin ita hahú fahe formulariu ba kandidatus sir aba rekrutamnetu polisia foun tinan 2025 no 2026 hahú horseik sua exelensia Segundu Komandante Jeral formalmente nia loke ona, hanesan mós Prezidente ba komisaun rekrutamentu, entaun sentru formasaun mós hetan fali orientasaun ida atu bele distribui formulario ba kandidatu sira,”dehan nia ba Jornalista sira iha CFP Akademia, Komoro, Dili, Tersa (05/08/25). Nia dehan, servisu sekretariadu rekrutamentu nian maka antes atu distribui formulariu ba kandidatu sira, ekipa sekretariadu rekrutamentu halo uluk pasa revista ba kandidatu sira hafoin distribui formulariu ba sira.
Tanba tuir kriteriu ne’ebé iha, kandidatu sira tenke ho idade 18 to’o 23 no altura feto 158cm no altura mane 165 cm.
“Ba kandidatura ne'ebé hakarak kandidata an, tenke ho idade 18-23, liu ida ne'e sei la passa no la foti formulario, tanba ida ne'e regras ne'ebé fó sai, no ba kandidatura nia altura mane tenke altura too 165 no feto 158,"tenik Superintendente Basilio de Jesus.
Nia afirma, distribuisaun formulario ba kandidatu sira hahú loron 5 to’o 29 fulan-Agostus, no husu ba kandidatu sira ne'ebé kartaun eleitoral iha Dili bele foti formulario iha Komando PNTL Munisipiu Dili no mós CFP Akademia Komoro.
Nune’e ba sira ne’ebé numeru kartaun eleitoral iha munisipiu bele foti formulariu iha Komando PNTL kada munisipiu.
Tanba ne’e, ekipa sekretariadu rekrutamentu husu ba joven sira ne'ebé iha interese atu mai foti formulario tenku ho disiplina, tuir orden no orientasun ne'ebé instituisaun PNTL fó sai.
Iha fatin hanesan, Kandidatu Ajente PNTL 2025, Martinho J. Barreto agradese ba instituisaun PNTL ne’ebé fó ona oportunidade ba joven sira atu kompete iha vaga refere.
Tuir regras ne'ebé Instituisaun PNTL fó sai ne'e di'ak, maibé iha parte balun joven sira kestiona kona-ba idade, nune’e sira husu atu iha futuru bele rekruta mós pesoal PNTL ho idade to'o 27, tanba joven barak ho idade ida ne'e mak dezempregu barak.
“Durante ne'e joven barak mak la iha kampu servisu, entaun ohin loron oportunidade di'ak tebes, esforsu an prepara hodi kompete iha etapa tuir mai, no esperansa ba futuru hakarak kontribui ba estadu liu husi esforsu ba oportunidade ida ne'e”hakotu nia.
