Portavós Eis Profesor Kontratadu 2023, Agostinho Pinto hatete, eis professores kontratadu sira kontinua hala’o protesta hasoru Komisaun Funsaun Públika ho Ministeriu Edukasaun tanba tuir lolos eis professor kontratadu sira la presiza ona halo tan teste, maibé presiza deit maka halo avaliasaun dezempeñu.

 Tanba tuir nia, eis professor kontratadu 2023 ne’e sai ona ajente administrasaun tuir lei númeru rejime espesial ho grau C, tuir dekretu lei 31/2023.  

“Ajente sira husi 2023 ne'e la presija ona teste, iha ona engresu espesial ba sira, soké presija deit mak halo avaliasaun desenpeñu, agora tanba saida mak Komisaun Funsaun Publiku ho Ministeriu Edukasaun la halo avaliasaun desempeñu. Tanba ne’e ami nia partisipasaun iha teste ida ne'e la’ós ami lakohi maibe ami hakarak rezolve uluk lai, tanba ami konsidera ida ne'e la justu, no diskriminasaun ida mai ami,” dehan Portavos ne’e ba Jornalista Online INDEPENDENTE iha resintu KFP, Kaikoli, Dili, Segunda (16/06/25).

Hatan ba preokupasaun eis professor kontratadu sira nian, Komisáriu KFP ba Forsa Trabalho José Telo Soares Cristovão hatete, servisu ida kontratadu ne'e, nia natureza akontese fulan neen ka bele extende tan ba fulan neen. Bainhira iha fulan neen nia laran maka Ministeriu Edukasaun propoin atu extende tan maka KPF sei bele kontinua extende.

“Karik fulan neen ne'e, Ministeriu Edukasaun propoin ami bele kontinua, ajente administrasaun publika ne'e hanesan kontratu eventual, konforme ba ministeriu,”dehan nia.

Nia hatutan, agora politika Ministeriu Edukasaun nian mak hakarak eis professor kontratadu tenke liu husi teste bolsa kandidatu atu bele tama iha ingresu espesial no tama iha rejime espesial ho grau c, tuir dekretu lei 31/2023 nian.

Tanba ne’e dalan ne’ebé diak maka obrigatoriu tenki tuir teste, funsaun públiku fatin ida ne’ebé fasilita hodi tuir teste, maibé iha kandidatu balun ne’ebé hakarak halo protestu, iha aula laran no nu’udar sidadaun tenki kumpre regra ne’ebé iha ona.

Entretantu, Prezidenti Juri João Amaral reforsa tan katak, tuir dadus, eis professor kontratadu 2023 ne’ebé partisipa iha teste espesial ne’e hamutuk 725.

“Husi 725 eis kontratadus ne'e depois teste hotu iha orsida lokraik remata turnu haat ne'e mak ita sei hatene rezultadu nain hira mak passa no la passa,”haktuir nia.

Entretantu,kandidatu ba sira ne’ebé konkore on aba iha vaga bolsa kandidata hamutuk rihun 8 resin no sira ne’ebé pasa ona iha teste hamutuk 714.

Enkuantu, iha tinan ida ne’e total vaga ne’ebé Ministeriu presiza maka hamutuk 1.450.